Мэдээлэл цуглуулах зорилгоор барууны дипломатуудыг урхидахын тулд залуус, бүсгүйчүүдийг бэлддэг нууц байгууллага Орост байсан гэж The Mirror бичжээ.

Эх сурвалжийн мэдээлснээр, Улсын аюулгүй байдлын хороо ОХУ-ын голчлон буурай хөгжилтэй бүс нутгуудаас  залуусыг тагнуул болгон элсүүлдэг аж. Тэднийг олон нийтийн газар, тэр дундаа клуб, цэнгээний газарт гадаадын иргэдтэй хэрхэн яриа өрнүүлэхэд сургадаг байсан гэнэ. Ийм тагнуулуудын ихэнх нь дуучин, бүжигчин, жүжигчин, багш нар байжээ.

Сонины нийтлэлд өгүүлснээр, хоёр Герман нэгдэхээс өмнө, Зөвлөлтийн хяналтад байсан Зүүн Германд Улсын аюулгүй байдлын хороотой холбоотой тусгай албаныхан тагнуулчдад тагнуул хийх, сэтгэлзүйг удирдах, Марксизм-ленинизмийн үндсийг заадаг байсан бөгөөд ийм тагнуулчдыг Ромео гэж нэрлэдэг байжээ. Эдгээр тагнуулууд нь боловсрол өндөртэй, сайхан хувцасласан, хошин шогийн мэдрэмжтэй эрчүүд байсан гэнэ. 

Зүүн Германы Штази нууц цагдаагийн газрын офицер асан Герхард Байерын өгүүлснээр, ийм тагнуулч эрчүүд эмэгтэйчүүдэд тэдэнтэй бүх насаа хамт амьдармаар санагдахуйц дотоод мөн чанараа харуулах нь нэн чухал байсан гэнэ. Ийм тагнуулчдын нэг Бонн дахь ХБНГУ-ын канцлерын нарийн бичгийн дарга бүсгүйг урхидаж, улмаар энэ бүсгүй нууц амрагтаа 14 жилийн туршид нууц мэдээлэл дамжуулдаг байжээ. Мөн дуурийн дуучдыг ч тагнуулын сүлжээнд элсүүлдэг байсан гэх бөгөөд тэдний нэг болох Константин Лапшин Москва дахь барууны дипломатчдыг урхидаж, олж авсан мэдээллээ нийтэд дэлгэнэ хэмээн сүрдүүлж, нэр хүндээ хамгаалах эсвэл улсаасаа урвах гэсэн сонголтыг тулгадаг байсан гэж эх сурвалж мэдээлсэн байна.

Г.Бямбасүрэн