Японы засгийн газар Оросын эсрэг тавьсан хориг арга хэмжээгээ өргөжүүлж, нисэх, сансрын салбарын сэлбэг хэрэгсэл, дрон үйлдвэрлэхэд ашиглагдаж болзошгүй бусад эд анги, материал нийлүүлэхийг хоригложээ. Энэ хориг дөрөвдүгээр сарын долооны өдрөөс эхлэн үйлчилнэ гэж Японы Засгийн газар мэдэгдсэнийг Kyodo дамжуулсан байна.

Орос руу экспортлохыг хориглосон бараа бүтээгдэхүүний жагсаалт ган болон түүгээр хийсэн эд зүйл, хөнгөн цагаан, хөнгөн цагаанаар хийсэн бүтээгдэхүүн, барилгын машинууд, нисэхийн хөдөлгүүрүүд, цахилгаан тоног төхөөрөмж болон түүний эд анги, навигацийн радиоаппаратур, үүсгүүрүүд, онгоц, сансрын аппаратууд болон тэдгээрийн сэлбэг хэрэгсэл, нисэгчгүй нисэх аппаратууд, оптик, гэрэл зургийн болоод хэмжилтийн тоног төхөөрөмж, тэдгээрийн сэлбэг хэрэгсэл, дугуйтай бүхий л тоглоом, угсардаг загвар, эвлүүлдэг тоглоом багтжээ. 

Энэ нь Украин дахь дайны хариуд авч буй хориг арга хэмжээ юм. Өмнө нь Япон улс дайн эхэлсний дараахан Оросын банкуудын хөрөнгийг  царцааж, Орос руу хагас дамжуулагч экспортлох зөвшөөрөл олгох журмыг чангатгаж байсан. Харин зургадугаар сард хоригоо дахин өргөжүүлж, ачааны машин нийлүүлэхээ зогсоосон бол энэ оны нэгдүгээр сараас эхлэн ОХУ руу вакцин, эмнэлгийн тоног төхөөрөмж нийлүүлэхийг хориглосон юм.

Г.Бямбасүрэн