Коронавируст халдварын эсрэг хариу арга хэмжээ авах нэрээр өнөөдрийг хүртэл санхүүжилт хийгдэж, зарлага гаргаж байгаа төслийн нэгж байна. 

Энэ нь Хөдөлмөр нийгмийн хамгааллын яамны харъяа Цар тахлын үед хариу арга хэмжээ авах нийгмийн хамгааллын төсөл юм. Монгол Улсын хувьд цар тахлаас урьдчилан сэргийлэх хүрээнд хийгдэж байсан ажлаа зогсоож байгаагаа мэдэгдээд багагүй хугацаа өнгөрсөн. Гэвч өнөөдөр цар тахлын гэх нэрэн дор төсвөөс санхүүжилт авч, зарлага гаргасаар байгаа юм. Тодруулбал, Цар тахлын үед хариу арга хэмжээ авах нийгмийн хамгааллын төслийн хүрээнд Төрийн сан болон Азийн хөгжлийн банкнаас НЭГ тэрбум 500 гаруй сая төгрөгийг шилжүүлжээ.

Энэ мөнгийг хэрхэн захиран зарцуулж байгаа талаараа Шилэн дансандаа дараах байдлаар мэдээлжээ. 

Тухайлбал, нэгдүгээр сард  Цар тахлын үед хариу арга хэмжээ авах нийгмийн хамгааллын төслийн хүрээнд 260 гаруй сая төгрөгийн гүйлгээ хийжээ. Харин хоёрдугаар сард 840 гаруй сая төгрөгийн 14 гүйлгээ, гуравдугаар сард 50 гаруй сая төгрөгийн гүйлгээг хийсэн байна. Төсвийн жил эхэлснээс хойш тус төслийн хүрээнд 20 гаруй гүйлгээ хийсний ихэнх нь хувь хүний данс руу шилжсэн нь анхаарал татаж байна. 

Төслийн удирдагчаар одоогоор Ц.Болормаа ажиллаж байгаа бөгөөд "Цар тахлын үед хариу арга хэмжээ авах нийгмийн хамгааллын төсөл-2”-ийг Азийн хөгжлийн банкны санхүүжилтээр хэрэгжүүлж эхлээд байгаа аж. Энэ хүрээнд Монгол Улсын Засгийн газраас хэрэгжүүлж байгаа хүүхдийн мөнгөн тэтгэмжид дэмжлэг үзүүлэх болон нийгмийн халамжийн тогтолцоог бэхжүүлэх гэсэн 2 үндсэн зорилтын хүрээнд үйл ажиллагаа явуулж байгаа аж. 

П.ГОО