Японы нэгэн төрийн албан хаагчийг ажлын цагаар тамхи татсан гэж буруутган 14700 доллараар торгожээ. Энэ талаар The Straits Times сонин мэдээлсэн байна. 

Тодруулбал, Осака мужийн санхүүгийн хэлтсийн 61 настай албан хаагч хамт ажилладаг хоёр хүний хамтаар ажлын цагаар олон удаа гарч тамхи татсан гэж буруутгагджээ. Энэ ажилтан 14 жилийн туршид нийт 4500 удаа гарч тамхилж, ажлын цаг цалгардуулсан гэж ажил олгогч нь буруутгаж, 14700 долларын торгууль ногдуулсан байна.

Харин түүнтэй хамт гарч тамхи татдаг хоёр ажилтны цалинг зургаан сарын туршид 10 хувиар бууруулахаар болжээ. 

Олон мянган долларын торгууль төлөх болсон ажилтан 14,5 жил ажиллахдаа 4512 удаа гарч тамхилахад 355 цаг 19 минут зарцуулсан байна. Осака мужид тамхи татахтай холбоотой хатуу хязгаарлалт үйлчилдэг бол 2019 оноос эхлэн ажлын цагаар тамхи татахыг хориглосон байдаг аж. 

Энд дуулгахад, Японд олон нийтийн газар тамхи татахыг хориглосон. Хуулийн дагуу явуут дундаа тамхи татахыг хориглосон байдаг аж. Тамхи татахаар бол гагцхүү зөвшөөрсөн цэгүүдэд зогсоод татаж болох бөгөөд явуут дундаа тамхи татсан тохиолдолд цагдаа зогсоон, өндөр торгууль оноодог юм байна.

Г.Бямбасүрэн