Швейцарын өндөр настан 2000 эмэгтэй Засгийн газар нь цаг уурын өөрчлөлттэй хангалттай тэмцэхгүй байгаа, энэ нь тэдний эрүүл байх, түүгээр ч зогсохгүй амьд явах эрхийг нь зөрчиж байна гэж үзэн Европын хүний эрхийн шүүхэд зарга мэдүүлжээ. Энэ нэхэмжлэлийг Европын хүний эрхийн шүүх гуравдугаар сарын 29-ний өдрөөс эхлэн авч хэлэлцэхээр болсон талаар ВВС агентлаг мэдээлсэн байна. 

Эх сурвалжийн мэдээлснээр, "Цаг уурын төлөөх ахмад насны эмэгтэйчүүд" нэртэй байгууллага Европын хүний эрхийн шүүхэд ханджээ. Энэ байгууллагад Швейцарын 2000 орчим эмэгтэй багтдаг бөгөөд тэдний дундаж нас 73 аж. 

Швейцарт бусад оронтой харьцуулахад цаг уурын дулаарал хурдацтай явагдаж байгаа, хэт халалтын улмаас ахмад настнуудын эрүүл мэнд, амь насанд эрсдэл учирж байгааг ахмад настнууд эмнэлгийн үзлэгийн картаа баримт болгон нэхэмжлэлд дурдпсан байна. Тиймээс шүүхэд хандан, Швейцарын засгийн газарт хүлэмжийн хийн хаягдлыг багасгах үүрэг хүлээлгэхийг хүсчээ.

Харин Швейцарын засгийн газар нэхэмжлэгчдийн эрх шүүхэд хандахуйц хэмжээгээр зөрчигдөөгүй тул энэ нэхэмжлэлийг шүүхээр хэлэлцэх шаардлагагүй гэж Европын хүний эрхийн шүүхэд батлахаар төлөвлөж байгаа гэнэ.

Цаг уурын өөрчлөлт хүний эрүүл мэндэд нөлөөлж болзошгүй гэдгийг Швейцарын засгийн газар үгүйсгээгүй ч гагцхүү ахмад настны эмэгтэйчүүдийн эрүүл мэндэд нөлөөлж байгаа гэдэг өнцгөөс нь асуудлыг харж болохгүй гэж мэдэгджээ.

Европын хүний эрхийн шүүхийн их танхим ахмад эмэгтэйчүүдийн нэхэмжлэлийг авч хэлэлцэн, улмаар "Цаг уурын төлөөх ахмад насны эмэгтэйчүүд" байгууллага шүүхэд ялвал энэ нь Европын хүний эрхийн шүүхийг хүлээн зөвшөөрдөг 46 орны хувьд ихээхэн цохилт болно гэж ажиглагчид үзэж байна. Учир нь цаг уурыг хамгаалахын төлөө тэмцэгчид эсэргүүцлийн аргаар төдийгүй хуульзүйн аргаар эрх баригчдадаа дарамт үзүүлэх боломжтой гэдгийг ухаарна гэж ажиглагчид онцолжээ.

Г.Бямбасүрэн