Төв Америкийн Гондурас улс Тайваниас дипломат харилцаагаа тасалсны дараа эх газрын Хятадтай дипломат харилцаа тогтоосон талаар Жэнминь жибао сонин мэдээлжээ. 

Эх сурвалжийн мэдээлснээр, БНХАУ-ын Гадаад хэргийн сайд Цинь Ган болон Гондурасын Гадаад хэргийн сайд Эдуардо Энрике Рейна нар дипломат харилцаа тогтоох тухай хэлэлцээрт Бээжин хотноо гарын үсэг зурсан байна. Гондурас улс Тайванийг БНХАУ-ын салшгүй хэсэг гэж заасан "нэг Хятад" зарчмыг хүлээн зөвшөөрсөн тул Тайваниас дипломат харилцаагаа тасалжээ. 

2016 онд Цай Инвэнь Тайванийн тэргүүн болсноос хойш Тайваниас харилцаагаа тасалсан ес дэх улс нь Гондурас болж байна. Одоо Тайванийг дэлхийн 13 орон тусгаар улс гэж хүлээн зөвшөөрч байгаа юм. Харин Хятад улс Тайванийг өөрийн нэг муж гэж үздэг.

Г.Бямбасүрэн