Германд сүүлийн 30 жилийн түүхэн дэх хамгийн том ажил хаялт үргэлжилж байгаа талаар Евроньюс агентлаг мэдээлжээ. Ажил хаялтын улмаас нийтийн тээвэр, нисэх буудал болон төмөр замын үйл ажиллагаа доголдсон байна. 

Эх сурвалжийн мэдээлснээр, даваа гарагт хот хоорондын галт тэрэгний хөдөлгөөн бүхэлдээ зогсжээ. Энэ ажил хаялтад 120 мянга орчим ажилтныг нэгдэхийг үйлчилгээ, тээвэр, дэд бүтцийн салбарын ажилтнуудын үйлдвэрчний эвлэл уриалсан байна. Тэд цалингаа доод тал нь 10,5 хувиар нэмүүлэхийн тулд ийнхүү эсэргүүцэж байгаа бөгөөд Германд инфляци өндөр байгаагийн улмаас амьдралын өртөг нэмэгдсэн тул цалингаа нэмүүлэхээр шаардан ажил хаяж байгаа аж. Энэ улсад суурь инфляци 3,6 хувьд хүрсэн байна.

Ажил хаялт олон салбарыг хамарсан тул эрх баригчид үйлдвэрчний эвлэлийнхэнтэй хамт хэлэлцээрийн ширээний ард суухаас аргагүй болсон гэнэ. Энэ хэлэлцээр лхагва гараг хүртэл үргэлжлэх аж. Эрх баригчид цалинг таван хувиар нэмэх санал тавьсныг үйлдвэрчний эвлэл хүлээж авалгүй, дахин ажил хаяна хэмээн мэдэгджээ. 

Г.Бямбасүрэн