Төрийн байгууллагуудын төсвийн хөрөнгөө хэрхэн зарцуулж байгаа талаарх мэдээллийг цувралаар хүргэж байгаа билээ. Энэ удаад Улаанбаатар хотын захирагчийн ажлын албаны өнгөрсөн хоёрдугаар сарын Шилэн дансны мэдээллийг хүргэж байна. 

Улаанбаатар хотын захирагчийн ажлын алба нь тус сард Наран, Морин, Цагаан давааны төвлөрсөн хогийн цэгүүдэд хөрсөөр дарж булах ажилд 411 сая төгрөг, халиа дошин, хаврын шар усны үерийн аюулаас урьдчилан сэргийлэх үзлэг шалгалт хийх, шаардлагатай арга хэмжээ авахад 110 сая төгрөг, золбин нохой, муур устгах, сэг зэмийг устгах булшлах ажилд 184 сая төгрөг, нийтийн эзэмшлийн талбайн цэвэрлэгээ хийхэд НЭГ ТЭРБУМ 700 сая гаруй төгрөг зарцуулсан гэдгээ мэдээлсэн байна. 

Мөн "Ердөө 90 минут" бүх нийтийн их цэвэрлэгээний багаж хэрэгсэл авахад 25 сая,  ердөө 90 минут бүх нийтийн их цэвэрлэгээний видео шторк хийхэд 7 сая төгрөгийн зарлага гаргасан талаар  Цалингийн зардлаас бусад таван сая төгрөгөөс дээш үнийн дүн бүхий зарлагын мөнгөн гүйлгээ хэсэгт мэдээлжээ. 

Улаанбаатар хотын Ерөнхий менежер бөгөөд Захирагчийн ажлын албаны дарга М.Баяраа дээрх байдлаар төсвийг захиран зарцуулах эрхийг эдэлдэг юм.