Олон улсын эрүүгийн шүүх Владимир Путинийг баривчлах шийдвэр гаргасан. Үүний дараа Холбооны Бүгд Найрамдах Герман Улсын Хуульзүйн сайд Марко Бушман мэдэгдэл хийхдээ Путин Германд ирвэл тус улсын эрх баригчид түүнийг баривчлах үүрэгтэй хэмээн мэдэгдэж байлаа. Харин үүнийг Оросын Аюулгүйн зөвлөлийн орлогч дарга Дмитрий Медведев дайн зарласантай ижил үйлдэл гэж тооцно хэмээн мэдэгджээ. 

"Ийм явдал хэзээ ч болохгүй гэдэг нь ойлгомжтой, гэхдээ яах вэ, ийм нөхцөл байдал үүслээ гэж бодъё. Цөмийн гүрний ерөнхийлөгч Герман руу очоод, тэндээ баривчлагдлаа гэж төсөөлье л дөө. Энэ нь юу гэсэн үг гээч? Энэ бол ОХУ-д дайн зарласан явдал" хэмээн Медведев Оросын сэтгүүлчдэд ярилцлага өгөх үеэрээ мэдэгджээ.

Түүний ярилцлагын хэсэг Телеграм суваг дахь Медведевийн хуудсан дээр нийтлэгдсэн байна. Германд ОХУ-ын Ерөнхийлөгчийг баривчилсан тохиолдолд Оросын "бүх хэрэгсэл Бундестаг, канцлерын офис болон бусад газар руу ниснэ" хэмээжээ.

"Энэ нь дайн зарлаж байгаа хэрэг гэдгээ тэр ойлгож байгаа болов уу? Эсвэл тэр муу сурлагатан байсан юм уу?" хэмээн Медведев өгүүлээд Германы хуульзүйн сайдыг "тэнэг, мулгуу" хэмээжээ.

Эргэн сануулахад, Олон улсын эрүүгийн шүүх Оросын Ерөнхийлөгч Владимир Путин болон хүүхдийн асуудал эрхэлсэн түшмэл Мария Львова-Белова нарыг украин хүүхдүүдийг хууль бусаар нутагруугаа зөөсөн хэрэгт буруутган, баривчлах шийдвэр гаргасан. Герман улс энэ шүүхийн шийдвэрийг гүйцэтгэх ёстой гишүүн орнуудын нэг тул Путин Германд ирсэн нөхцөлд баривчлах үүргээ биелүүлнэ гэж тус улсын Хуульзүйн сайд Бушман мэдэгдсэн юм. 

Г.Бямбасүрэн