БНХАУ-ын дарга Ши Жинпинь Москвад айлчилж, ОХУ-ын Ерөнхийлөгч Владимир Путинтэй хэлэлцээ хийж, иж бүрэн түншлэлийн харилцаагаа бэхжүүлж, эдийн засгийн хамтын ажиллагаагаа гүнзгийрүүлэхээр тохиролцсон юм. 

Ши Жинпиний айлчлал: Биелсэн болон үл биелсэн таамаглалууд

Хоёр орны төрийн тэргүүн эдийн засгийн хамтын ажиллагааны талаар олон асуудал хэлэлцсэний дотор Монголоор дайрах "Сибирийн хүч-2" байгалийн хийн хоолойны талаар ч тодорхой тохиролцоонд хүрчээ.  

Тодруулбал, Орос Хятад улс хэлэлцээрийн явцад Монголын нутгаар дайрах хийн хоолойг барих тухай хэлэлцээрийн үндсэн бараг бүх үзүүлэлтүүдийг тохиролцсон гэж ОХУ-ын Ерөнхийлөгч Владимир Путин мэдэгдсэн байна. 

"Хийн салбарт Орос, Хятадын хамтын ажиллагаанд томоохон боломжууд нээгдэж байна. 2022 онд Орос улс Сибирийн хүч хоолойгоор БНХАУ руу нийлүүлэх хийн нийлүүлэлтээ бараг 1,5 дахин нэмэгдүүлсэн. Дөнгөж сая бид Монголоор дамжих "Сибирийн хүч-2" шинэ хийн хоолойн сайн төслийг хэлэлцлээ. Энэ хэлэлцээрийн бараг бүх үзүүлэлтүүдийг тохиролцсон. Хоолой ашиглалтад орсноос Оросоос 50 тэрбум кубметр хийг нийлүүлэх юм. Хийн хоолойтой холбоотой бүхий л хэлэлцээрийг Монголтой хийсэн" хэмээн Владимир Путин мэдэгджээ. 

Энэ хэлэлцээрийн дараа ОХУ-ын дэд сайд Новак мэдэгдэл хийхдээ,  Орос, Хятадын төрийн тэргүүнүүд Сибирийн хүч-2 хийн хоолойн баримт бичигт гарын үсэг зурахад бэлдэх ажлыг ойрын хугацаанд дуусгах үүрэг өгснийг онцолсон байна. 

Г.Бямбасүрэн