УИХ-ын чуулганы нэгдсэн хуралдаанаар Олон нийтийн сүлжээнд хүний эрхийг хамгаалах тухай хуульд тавьсан Ерөнхийлөгчийн хоригийг хэлэлцэн, гишүүдийн олонхын саналаар хүлээн авлаа.

Хуулийг санаачлагч Цахим хөгжил, харилцаа холбооны сайд Н.Учрал “УИХ өнөөдөр хоригийг хүлээж авч байна. Цахим залилан, цахим гэмт хэрэг, цахим орчинд хүүхэд, хүний эрхийг зөрчиж байгаа үйлдлүүд өдөр ирэх тусам нэмэгдэж байна. Миний хувьд Засгийн газраас өргөн барьсан хуулийнхаа үзэл санаа, үнэт зүйлээс ухраагүй. Цаашид хуулийг олон нийтээр хэлэлцүүлж, эрх нь зөрчигдөж байгаа этгээдүүдийн саналыг тусгаж, дахиж оруулж ирэх бололцоо бидэнд байгаа.

Энэ хууль цахим орчинд эрх нь зөрчигдөж байгаа этгээдүүдийн эрх ашгийг хамгаалахаар хийсэн эхний үйлдэл байсан. Хууль бол цаг хугацааны л асуудал. Энэ хууль нэгэн цаг үед батлагдах ёстой хууль. Ашиг сонирхол нь зөрчигдөж байгаа этгээдүүдтэй хамтран ажиллаж, олон нийтээр хэлэцүүлэн үндэсний аюулгүй байдал, нийтлэг эрх ашгийнхаа төлөө нэг аавын хүү нэг өдөр энэ хуулийг өргөн барих байх.

Хориг тавих, хоригийг хүлээж авах нь хоёр том институцийн бүрэн эрх учраас үүнд би тайлбар хэлэх нь илүүц байх” гэсэн байр суурийг илэрхийллээ.