УИХ-ас байгуулагдсан Монгол Улсын Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явц, байдлыг хянан шалгах түр хорооноос Нотлох баримтыг шинжлэн судлах сонсгол өнөөдрийн үйл ажиллагаа эхэллээ. 

Өнөөдрийн сонсголын эхэнд Ноолуурын салбарт эргэлтийн хөрөнгийн зориулалттай зээл олгох хөнгөлөлттэй зээлийн зарцуулалтыг хэлэлцэнэ. Дараалал ёсоор зээлийн асуудалтай холбогдуулан "Говь" компанийн Гүйцэтгэх захирал Ц.Баатарсайхан гэрчээр дуудагдсан ч гадаад явсан гэх шалтгаанаар тус компанийн Санхүү эрхэлсэн дарга Б.Энхмандах, Хуулийн хэлтсийн дарга Ц.Цасчихэр нарыг төлөөлөл болгон явуулсан ч тэд сонсголд ирсэнгүй. 

Ноолуурын салбарыг дэмжих төсөл хөтөлбөрийнх хүрээнд арилжааны НАЙМАН банкаар дамжуулан 89 зээлд 273 тэрбум төгрөгийн санхүүжилт олгосон байна. Эдгээрээс өнөөдрийн байдлаар ЗУРГААН зээлдэгчийн 8,8 тэрбум төгрөгийн зээлийн өрийн үлдэгдлээ төлөөгүй, зөрчил үүсгэсэн байдалтай байна. 

Зээлдэгчийн МЭДЭЭЛЭЛ: 

-"Капитал" банк нь Ноолуур хөтөлбөрийн хүрээнд "Мөнххаан трейд" ХХК-нд ТАВАН тэрбум төгрөг, "ГГТС" ХХК-нд ТАВАН тэрбум төгрөг, "Буянколорпарк" ХХК-нд ТАВАН тэрбум төгрөгийг дамжуулан зээлдүүлсэн байна. Гэвч нотлох баримтыг шалгахад "Мөнххаан трейд" ХХК-нд зээл олгосон эсэх нь нотлогдохгүй байгаа бөгөөд "Буянколорпарк" ХХК-нд олгосон ТАВАН тэрбум төгрөгөөс 2,5 тэрбум төгрөгийг дамжуулан олгсон байдалтай байна. "Мөнххаан трейд" ХХК нь зээл авах үед "Бишрэлт холдинг" ХХК-ийн эзэмшилд байсан бөгөөд гүйцэтгэх захирлаар А.Чинбишрэлт ажилладаг байжээ. Данс хөөж шалгах үед тус компанийн дансны хуулга программаас зөрчилтэй гарсан бөгөөд зээлийн хувийн хэргийг архиваас шүүлгэхэд КАПИТАЛ банкны ажилтнуудаас тухайн зээлийн хувийн хэрэг олдоогүй гэсэн тайлбар ирүүлсэн. Иймд Хөгжлийн банкны архиваас зээл олгосон баримтыг гаргуулан авахад огт гүйлгээ хийгдээгүй дансны хуулга гарч ирж байгааг Капитал банкны Гүйцэтгэх захирал асан А.Ариунболд, Эрх хүлээн авагчаас тодруулах шаардлагатай хэмээн шинжээч үзжээ. 

-ГОВЬ ХК нь Ноолуур хөтөлбөрийн хүрээнд нийт таван удаа болон "Дулаан гэр" ХХК-тай хамтран 31,2 тэрбум төгрөгийн санхүүжилт, Хөгжлийн банкнаас шууд зээлээс 161 тэрбум төгрөгийн зээл авсан. Говь ХК-ийн эцсийн өмчлөгч, гүйцэтгэх захирлаар Ц.Баатарсайхан ажилладаг, гэрчээр дуудагдсан. Нийт дамжуулан олгосон ноолуурын санхүүжилтээс 17 тэрбум төгрөгөөр "Таванбогд трейд" болон "Таванбогд фүүдс пицца" компанийн зээл өрийн төлбөрийг төлсөн байна. Уг зээл үйлдвэрийн тоног төхөөрөмжийг шинэчлэх хөтөлбөрийн хүрээнд олгосон ч Говь ХК найман тэрбум төгрөгийг хадгаламжийн дансандаа байршуулж байжээ.