Энэтхэгийн долоон настай охин Праанви Гупте дэлхийн хамгийн залуу йогийн багшид тооцогдож, Гиннесийн номонд бүртгэгджээ. Энэ талаар India Times мэдээлсэн байна. 

Охин ээжийгээ дуурайн 3,5 настайгаасаа йогоор хичээллэж эхэлсэн гэнэ. Анхандаа ээжийнхээ хажууд суун, түүнийг дуурайж дасгал хийдэг байсан Праанви удалгүй бие даан йогоор хичээллэх болсон байна. Улмаар долоон настайдаа  сургуулийнхаа амралтаар сургалтад хамрагдаж, эндээс багшлах хүсэл нь төрсөн гэж охин ярьжээ.

Ингээд аль болох олон хүнд йог заахыг хүссэн охин йогийн багш бэлтгэх сургалтад явж эхэлсэн байна. Праанви охин 200 цагийн сургалтад хамрагдсаны дараа багшлах эрхийн гэрчилгээгээ авчээ. Ингэснээр тэрбээр, дэлхийн хамгийн залуу йогийн багш, мөн л Энэтхэг гаралтай 9 нас 220 хоногтой Рейанш Суранигаас ч залуу багшид тооцогдож, Гиннесийн номонд бүртгэгджээ. 

Охины өгүүлснээр, сургуулийнхаа хажуугаар йогийн багшийн сургалтад явахад хүндрэлтэй байсан ч багш нар болон эцэг эхчүүдийнхээ дэмжлэгтэйгээр мэргэжлийн шалгалтаа амжилттай өгсөн гэнэ. Тэрбээр йог хүүхдүүд, насанд хүрэгчдэд нэн тустай, анхаарал төвлөрлийг сайжруулж, эрүүл, аз жаргалтай амьдрахад тусладаг хэмээн онцолжээ.

Г.Бямбасүрэн