УИХ-аас байгуулагдсан Монгол Улсын Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явц, байдлыг хянан шалгах түр хорооноос Нотлох баримтыг шинжлэн судлах сонсголын гурав дахь шат Төрийн ордноо  өнөөдөр /2023.03.14/ хоёр дахь өдрөө үргэлжилж байна. 

Өнөөдрийн сонсгол 2016 онд олгосон “Газар тариалангийн үйлдвэрлэлийг тогтворжуулах” богино хугацааны хөтөлбөрт олгосон зээлийн асуудлаар үргэлжилж байна. Уг зээлийн асуудалтай холбогдуулан ХХААХҮЯ-ны Төрийн нарийн бичгийн дарга Т.Жамбалцэрэн, тус яамны Газар тариалангийн бодлогын газрын дарга Д.Есөн-Эрдэнэ, ХААН банкны Эрсдэл хариуцсан дэд захирал Д.Энхбаатар тус банкны төслийн менежер Ж.Гантөмөр, Төрийн банкыг төлөөлж Э.Батбаяр, Б.Амарсанаа, Капитрон банкны гүйцэтгэх захирал Б.Үүрцайхбаатар нарыг гэрчээр дуудаж, хүрэлцэн иржээ. 

Харин Худалдаа хөгжлийн банкаар дамжуулан олгосон зээлтэй холбогдуулан тус банкны гүйцэтгэх захирал О.Орхоныг гэрчээр дуудсан ч ирээгүй, тус банкны Байгууллагын банкны захирал Нямсүрэнг дуудсан ч мэдэгдэх хуудсыг хүлээн авахаар татгалзсан бол "Дорнод гурил" ХХК-ийн гүйцэтгэх захирал Д.Өлзийбаяр мөн гэрчээр дуудагдсан ч ирээгүй байна. 

Нийт 93 төсөлд таван банкаар дамжуулан зээл олгожээ.

Түр хорооны дарга Б.Энхбаяр: Товхонхан ХХК бол Засгийн газрын хэрэг эрхлэх газрын даргаар ажиллаж байсан С.Баярцогт сайдынх. 700 сая төгрөгийн зээлийг авахад С.Баярцогт сайдаар ажиллаж байсан уу? 

Шинжээч: Товхонхан ХХК нь Төрийн банкнаас 2016 оны зургадугаар сарын 2-оос 2018 оны зургадугаар сарын 2-ны өдрийг хүртэл хугацаатайгаар тус зээлийг авсан байна. 

Түр хорооны дарга Б.Энхбаяр: Яг 2016 оны сонгуулийн үеэр олгосон зээл байна.