НЭМЭЛТ: “Хөтөл“ ХХК-д холбогдох хэргийн шүүх хурлыг ирэх сарын 28-н хүртэл дахин хойшлуулсан байна

"Хөтөл" ХХК-ийн шүүх хурал өнөөдөр товлогдсон. Нийт 16 удаа хойшлогдсон уг хурал Баянгол дүүргийн иргэний анхан шатны шүүх дээр 10 цагаас эхлэх юм. 

"Хөтөл" болон “Кью эс си” ХХК-иуд Хөгжлийн банкнаас авсан зээлээ Эрдэнэтийн 49 хувийг авахад зарцуулж, зориулалт бусаар зарцуулсан гэх асуудал хөндөгдөж буй.  "Хөтөл" ХХК-ийн цементийн үйлдвэрлэлийн хүчин чадлыг нэмэгдүүлэх төсөлд Хөгжлийн Банкнаас 61.2 сая ам.долларын зээл олгосон байдаг.

Одоогоор зээлийн үндсэн үлдэгдэл 210 тэрбум 85 сая төгрөг, нийт 374 тэрбум 45 сая төгрөгийн үлдэгдэлтэй бөгөөд хамгийн муу гурван зээлдэгчийн нэг болохыг Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явцын талаар Хянан шалгах үүрэг бүхий түр хорооны нотлох баримтыг шинжлэн судлах  сонсголын үеэр онцолсон юм.  

Хөгжлийн банкинд бүртгэлтэй 52 зээл байгаагаас  Хөтөл ХХК, Бэрэн ХХК, Эрэл ХХК -ийн зээл нийлээд 800 орчим тэрбум хүрч байна.  2019 оноос хойш "Хөтөл" ХХК-ийн зээлийг төлүүлэх анхан шатны шүүх хурал 16 удаа хойшлогдсон нь нийгмийн анхаарлыг татаж байгаа асуудлыг нэг болоод байна.

П.ГОО