Хойд Солонгос хоёрдугаар сарын 18-нд тив алгасах нэг пуужин, хоёрдугаар сарын 20-ны өдөр хоёр баллистик пуужин хөөргөсөнтэй холбоотойгоор Японы эрх баригчид НҮБ-ын Аюулгүйн зөвлөлд хандан шуурхай хуралдаан зарлахыг хүсчээ. 

"Уржигдар тив алгасах пуужин хөөргөсний дараа өнөөдөр баллистик пуужингууд хөөргөлөө. Тиймээс бид НҮБ-ын Аюулгүйн зөвлөлийн ээлжит бус хуралдааныг зарлахыг хүссэн. АНУ, Өмнөд Солонгостой хамтрах ажиллагаагаа гүнзгийрүүлж, сэрэмжтэй байдлаа хадгалах, мэдээлэл цуглуулах ажлаа үргэлжлүүлэх шаардлагатай байна" хэмээн Японы Ерөнхий сайд Фумио Кишида мэдэгджээ.

Хойд Солонгос хоёр өдөр пуужин харваснаа даваа гарагт баталсан юм. Тус улс шуурган галын тийрэлтэт систем ашиглан сургуулилалт хийсэн хэмээн мэдэгджээ. Эдгээр пуужингууд Япон тэнгист унасан байна. Үүний дараа Япон улс Хойд Солонгост эсэргүүцэл илэрхийлсэн юм.

Г.Бямбасүрэн