"Өглөөний хоолыг өөртөө, өдрийн хоолыг нөхөртөө, оройн хоолыг дайсандаа" гэсэн үг бий. Энэ нь өглөөний цай заавал уух, өдөр, оройн хоолыг тохируулж идэхийн ач тусыг ойлгуулах үг. Гэсэн ч өглөөд ажил, сургуульдаа яарсан гэх шалтгаанаар өглөөний цай уухгүй байсаар энэ нь зуршил болсон хүн олон. Ийм зуршил хүний эрүүл мэндэд ихээхэн сөрөг нөлөөтэй байдгийг эмч нар анхааруулдаг юм. Энэ нь ч учиртай, өглөөний цай зайлшгүй уух таван шалтгаан бий. 

1. Бодисын солилцоог түргэсгэнэ

Бидний бие организм 7-8/ цаг унтах хугацаанд амарч, өглөө цэвэршихдээ бэлдэж байдаг. Шөнийн цагаар хүмүүсийн бодисын солилцоо удааширдаг. Тиймээс өглөө нь бие организм "сэргэх", хоол боловсруулах явц ажиллах ёстой байдаг аж.

Тиймээс өглөөд нэн тэргүүнд хийжүүлээгүй ус нэг аягыг уугаарай. Үүний дараа хөнгөхөн цайлна. Хүмүүс өглөө амттан идэж болно гэж боддог ч энэ нь бамбай булчирхайд ачаалал өгч, цусан дахь глюкозын түвшнийг эрс нэмэгдүүлэх эрсдэлтэй аж. Тиймээс нэг их удалгүй өлсдөг байна. Харин амттаны оронд овъёостой хоол идвэл бие эрч хүчээр дүүрч, хоол боловсруулах явц түргэсдэг байна.

2. Жинг тэнцвэржүүлнэ

Жингээ хянадаг хэн бүхэн өглөөний цайг заавал уух ёстой гэдгийг мэддэг. Өглөөд сайтар цайлснаар өдрийн туршид хоолоо зохицуулж, хэт их идэх эрсдэлийг бууруулдаг.

3. Өдрийн туршид авах хоол тэжээл ашигтай нөлөө үзүүлнэ 

Өглөөний цайнд тохирох хүнс сонгохын тулд арай эрт босох хэрэгтэй болдог. Эрт босож, хүнсээ сонгох зэрэг нь өдрийн туршид зөв хооллох дэглэмд сайнаар нөлөөлөх эхний алхмууд болдог аж. Өглөөд "зөв хооллосон" хүн өдөр, орой түргэн хоол, шингэц муутай хоол идэх нь бага.

Өглөөний цайнд өндөг, аарц, төрөл бүрийн будаа, чихэрлэг биш жимснүүд тохиромжтой байдаг.

4. Анхаарал төвлөрөх чадвар нэмэгдэнэ

Чухал ярилцлага эсвэл хүндхэн шалгалт өгөх ёстой бол өглөөний цайгаа заавал уугаарай. Унтаад сэрсний дараа хүний бие организм дахь глюкозын хэмжээг тэнцвэржүүлэх шаардлагатай байдаг, харин үүнд өглөөний цай ихээхэн сайн нөлөөтэй байдаг аж.

Өглөөний цай уугаагүй үед анхаарал сарниж, нойрмоглож, амархан ядардаг. Цайлахдаа амин дэм, эрдсээр баялаг хүнс сонгоорой. Чухамхүү эдгээр нь анхаарал төвлөрөлтөд нөлөөлдөг. 

5.  Сэтгэл санаа өөдрөг байна

Байнга л завгүй, өдөржин ийш тийш яарсан хөл хөдөлгөөнтэй хотод амьдарч байгаа хүмүүсийн амьдралын хэмнэл яг л цагариган доторх хэрэм шиг эргэлдэж байдаг. Тиймээс энэ бүхэн рүү "шумбан орохоосоо" өмнө өөртөө хэсэгхэн цаг гаргаж, тайван цайлах нь сэтгэл санааг өргөж, ядарч сульдсан биеийг сэргээдэг

Г.Бямбасүрэн