2019 онд ашиглалтад орсон байх ёстой Тавантолгой дулааны цахилгаан станц өнөөдөр мартагдаж байна. Мянга мянган хүнийг ажлын байраар хангасан байх ёстой тус төсөл өнөөдөр цагаан дээр хараар бичигдсэн хэвээр 10 гаруй жилийн нүүрийг үзлээ.

Тус станцыг 2009 оноос эхлэн хувийн хэвшлийн компани барьж ашиглалтад оруулахаар ажиллаж эхэлсэн дарга нарын үзэглэсэн гэрээнээс өөр юм үлдсэнгүй. Л.Оюун-Эрдэнийн Засгийн газрын “Шинэ сэргэлтийн бодлого”-ын эрчим хүчний сэргэлтийн хүрээнд эрчим хүчний шинэ эх үүсвэр барих төслүүдийг эхлүүлэхээр тусгасан. Үүний нэгдүгээрт Тавантолгой дулааны станц бичигдэж буй. 

Өнөөдөр Оюутолгой компани урд хөршөөс 110-120 сая ам.долларын өртөгтэй цахилгаан эрчим хүчийг авч байна. Үүнийг орлох боломжтой төсөл бол Тавантолгой дулааны цахилгаан станц. Тус станц цаасан дээр бууж ТЭЗҮ-ийг шинэчлэн боловсруулсан ба 808 сая ам.доллар шаардлагатай гэх тооцоо гарсан. Улмаар гурван жилийн өмнө Засгийн газар тус станцыг барихад шаардлагатай 808 сая ам.долларын санхүүжилтийн 30 хувийг хувьцаа эзэмшүүлэх замаар “Эрдэнэс Тавантолгой” компаниас, 70 хувийг нь Засгийн газрын баталгаа гарган зээлийн хөрөнгөөр барихаар болсон. 

Тэгвэл өнгөрсөн хугацаанд хоёр удаа тендер зарлаж үр дүнд хүрээгүй Тавантолгой ДЦС гурав дахь удаагаа тендер зарлагдахаар бэлтгэл ажлаа хангаж эхэлжээ. Одоогоор гадаадын хэд хэдэн банк санхүүгийн байгууллагатай уулзаж төслөө танилцуулж, холбогдох материалаа хүргүүлээд амжсан байна.  450 мегаватт (МВт)-ын хүчин чадалтай тус станцыг барих гүйцэтгэгчийг сонгон шалгаруулах ажиллагаа буюу гурав дахь удаагийн тендер өндөр хүлээлт үүсгэж байгаа талаар эх сурвалж мэдээллээ. 

П.ГОО