Увс аймгийн Улаангом сумаас Завхан сумын Хэцүү хад гэдэг газрын чиглэлд зорчиж явсан суудлын автомашин Хяргас нуурын мөсөнд цөмөрч, живжээ. Тухайн машины зорчигчид эсэн мэнд гарсан байна.

Энэ тухай дуудлага 02 дугаар сарын 11-ний өдрийн 13:20 цагт онцгой байдлын байгууллагад иржээ. Тус аймгийн Онцгой байдлын газрын Эрэн хайх, аврах салбар, Завхан аймгийн Онцгой байдлын газрын Сонгино сум дахь Эрэн хайх, аврах бүлгийн  алба хаагчид ажиллаж, иргэн Г-ын “Тоёота хайлюкс” загварын суудлын автомашиныг 02 дугаар сарын 14-ний өдрийн 17:45 цагт “Хяргас” нуурын 18 метрийн гүнээс татан гаргасан байна.