Туркэд газар хөдлөлтийн үеэр нурсан барилгын архитектор болон гүйцэтгэгчийг баривчилсан талаар РБК агентлаг мэдээлжээ.

Тодруулбал,  Мехмет Яшар Жошкун хэмээх архитекторыг нисэх буудал дээр байхад нь саатуулан баривчилсан бөгөөд тэрбээр газар хөдлөлтийн улмаас нурсан "Ренессанс" 12 давхар орон сууцны хорооллын барилгын ажлыг гүйцэтгэсэн архитектор аж. Тэрбээр их хэмжээний мөнгө аван улсаасаа зугтах гэж байсан гэж Туркийн хэвлэлүүд мэдээлжээ. 

Sabah сайтын мэдээлснээр "Ренссанс" орон сууцны хороолол нь бүс нутгийнхаа хамгийн тансаг хорооллуудын нэг гэнэ. Энэ хорооллын нэг байрны үнэ 79,7 мянгаас 159,3 мянган долларын үнэтэй аж. Орон сууцны барилгын ажлыг 2012 онд дуусгажээ.

Асар өндөр үнэтэй энэ байр хоёрдугаар сарын зургааны өдөр Туркэд болсон газар хөдлөлтийн улмаас энэ хороолол бүхэлдээ нурсан байна. Газар хөдлөлтийн дараа гарсан гэрэл зураг, дүрс бичлэгүүдээс харахад барилга бүгд нэг чигт ханаран унажээ. Энэ барилгын нурангин дор мянга орчим хүн байж болзошгүй гэж аврагчид үзэж байгаа аж.

Туркийн хэвлэлүүд энэ барилга хэрхэн нуран унасныг харуулсан гэрэл зураг, дүрс бичлэг нийтлэсний дараа Туркийн хууль сахиулах байгууллага энэ орон сууцны хорооллыг барьсан компанийн удирдлагыг баривчлах зөвшөөрөл өгчээ. Ингээд Жошкунийг Стамбулын нисэх буудал дээрээс их хэмжээний мөнгө аван, Черногор явах гэж байхад нь баривчилсан байна.

Барилгын салбар, эрх баригчдаас хариуцлага нэхсэн нь 

Газар хөдлөлт болсны дараагаас л Туркийн олон нийтийн сүлжээгээр засгийн газара шүүмжилсэн нийтлэлүүд хөврөх болсон юм. Туркийн оршин суугчид 1999 оны газар хөдлөлтийн дараа барилгын норм журмыг чангатгасан ч авлигад идэгдсэн албан тушаалтнууд барилгын чанарт анхаарахгүй байгааг шүүмжилж байв. 1999 онд Туркэд газар хөдлөж, 17 мянган хүн амиа алджээ. Үүний дараа барилгын хуулийг чангатгахын дээр "газар хөдлөлтийн татвар" авах болсон байна. Чангатгасан хуулийн дагуу барилгуудыг газар хөдлөлтөд тэсвэртэй  байхаар барих ёстой байсан бол "газар хөдлөлтийн татвар"-ыг  шуурхай албадыг хөгжүүлэхэд зарцуулах ёстой байж. Түүнчлэн энэ мөнгийг барилгуудыг бэхлэхэд зарцуулах ёстой байсан ч Туркийн эрх баригчид зориулалтаас нь өөрөөр буюу зам барихада зарцуулжээ.

Түүнчлэн хотыг өөрчлөн шинэчлэх, барилга байшингийн бэхлэгээг сайжруулахад шаардлагатай мөнгийг төсвөөс хасаж, үүний оронд батлан хамгаалахын салбарынхаа төсвийг нэмэгдүүлж байсан гэнэ. Үүний зэрэгцээ барилгын салбарынхны "шунахай сэдэл" гал дээр тос нэмсэн хэрэг болжээ. Барилгын компаниуд барилгын араг ясан хийц дээр хэмнэлт хийж, ингэснээр өнөөх барилгуудын газар хөдлөлтөд тэсвэртэй байх чанарт нөлөөлжээ. Даваа гарагт болсон газар хөдлөлтийн дараа шинэ барилгуудаас бүрдсэн бүхэл бүтэн хорооллууд хөзрөн байшин шиг нурж байхад хуучны зарим барилгууд бүрэн бүтэн үлдсэн нь гагцхүү барилгын компаниуд мөнгөө хэмнэснээс үүдэлтэй гэж шинжээчид үзэж байгаа юм.

Ингээд барилга хүлээн авах комисс, зөвшөөрөл өгдөг албан тушаалтнууд, чанаргүй барилга барьсан компанийн удирдлагуудад хилийн хориг тавьж хатуу тэмцэхийг уриалсан хөдөлгөөн ид өрнөж, Туркийн ард түмэн "амийг амиар" хэмээн шаардсаар байгаа аж. 

Г.Бямбасүрэн