Монгол Улсын дээд шүүхийн нийт шүүгчийн хуралдаан болж байна. Өнөөдрийн хуралдаанаар Л.Гантөмөрийг Ардчилсан намын даргаар бүртгүүлэх тухай Ч.Өнөрбаяр, Л.Гантөмөр нарын өргөдөл, Д.Ганбатыг Ардчилсан намын даргаар бүртгүүлэх тухай С.Эрдэнийн өргөдлийг тус тус хэлэлцэж, “Монгол Улсын дээд шүүхийн цахим хуудасны “Улс төрийн намын бүртгэл” хэсгийн мэдээллийг шүүхийн шийдвэр, хувийн хэрэг, үндсэн баримт бичгүүдтэй тулган шалгах” ажлын хэсгийн тайлантай танилцана.  

Үүнтэй холбогдуулан С.Эрдэнийн талын АН-ын дээд шүүхийн үүдэнд мэдээлэл хийлээ. 

Энэ үеэр "Л.Гантөмөр гэдэг хүнийг сонгосон процесс нь Улстөрийн намын тухай хууль, Хуулийн этгээдийн улсын бүртгэлийн тухай хууль болон Ардчилсан намын улсын дээд шүүхэд бүртгэлтэй Үндсэн дүрмийн 20-30 заалтыг зөрчсөн процесс болсон" хэмээн мэдэгдлээ. 

Мөн Ардчилсан намын Дотоод сонгуулийн хорооны дарга асан Х.Алтанхуяг "Өнөөдөр МУ хуультай улс эсэх асуудлыг шийдэх гэж байна. Хууль бус дүрмийн бус сонгуулиар гаргасан даргыг батламжлах гэж оролдож байна. Миний удирдаж байсан дотоод сонгуулийн хороо төрийн гурван сонгуульд нэр дэвшигчээ дэвшүүлсэн. Хэрэв өнөөдөр энэ хууль бус үйл ажиллагаа явах юм бол Ерөнхийлөгчийн сонгууль, УИХ-ын хоёр сонгуулийг хүчингүй болгох асуудлыг гаргаж тавина. Дээд шүүхийнхэнд хэлэхэд тоглоом хүртэл дүрэмтэй байдаг шүү. Та бүхэн улстөрийн намын тухай хууль бий. Та бүхэн улстөрийн намын үйл ажиллагаанд хөндлөнгөөс бүдүүлгээр оролцож болохгүй гэдгийг анхааруулж байна" гэсэн юм. 

Үүний дараа АН-ын ҮБХ-ны гишүүн О.Батханд "Хууль дүрмээ дагадаггүй шийдвэр гаргах юм бол АН-ын 200 мянган гишүүн тэсэрнэ шүү. МАН-ын дарга нар аа, Улсын Дээд шүүх танай охин компани юм бол АН-ын 200 мянган гишүүн цагаан сарын дараа тэмцэхэд бэлэн байгаа шүү. Бид хөх туган дороо нэгдээд гарахын цагт Ардын намынхан цусаар уйлавч зогсоож чадахгүй шүү" гэлээ.

П.ГОО