Өнөөдөр Засгийн газар ээлжит хуралдаанаа хийнэ. Хуралдаанаар Хөдөлмөр нийгмийн хамгааллын сайд Т.Аюурсайханыг чөлөөлөх асуудлыг авч хэлэлцэнэ. 

Учир нь өчигдөр ХНХ-ын сайд УИХ-ын гишүүн Т.Аюурсайхан чөлөөлөгдөх хүсэлтээ хүргүүлсэн. Түүний зүгээс " Миний бие Улсын Их Хурлын гишүүний бүрэн эрх, халдашгүй байдлаас татгалзаж байж албан тушаалын аливаа нөлөөлөл, саад тотгоргүйгээр зохих ёсоор шалгуулж, хууль, шүүхийн өмнө үнэн мөнөө тогтоолгох хүсэлтэй байна.

Энэ асуудал нь надаар зогсохгүй Засгийн газрын нэр хүндэд сөргөөр нөлөөлөх эрсдэлтэй байгаа тул үүнээс сэргийлэх үүднээс Засгийн газрын гишүүн, сайдын албан тушаалаас ч сайн дурын үндсэн дээр чөлөөлөгдөх нь зүйтэй гэж үзлээ.

Засгийн газрын гишүүн миний бие хууль хяналтын байгууллагад шалгагдахын хажуугаар сайдын албыг эрхлэх нь ёс зүйн хувьд зохимжгүй учраас Засгийн газрын гишүүн, Хөдөлмөр, нийгмийн хамгааллын сайдын албан тушаалаас чөлөөлөгдөх хүсэлтээ гаргалаа" хэмээсэн. 

Иймээс өнөөдрийн Засгийн газрын хуралдаанаар түүнийг чөлөөлж, дараагийн сайдын томилгоог ярих юм. Т.Аюурсайханы хувьд өнгөрсөн оны аравдугаар сарын 21-нд сайдын албан тушаалаа хүлээн авч, дээлээ давхарласан. Гэвч нийгмийн бухимдалд автуулсан нүүрсний хулгайн асуудалд давхар дээлтэй Т.Аюурсайхан нэг холбогдов. Түүний хамаарал бүхий найман хүн өнөөдөр хуулийн байгууллагад шалгагдаж буй. 

Нөгөө талаар Засгийн газрын тэргүүн Л.Оюун-Эрдэнэ  өнгөрсөн долдугаар сард “Авлигатай тэмцэнэ гэдэг бол бид өөрөө өөрсөдтэйгээ, мөн намынхаа журмын нөхөдтэйгөө тэмцэнэ гэсэн үг” хэмээн мэдэгдсэн. Иймээс танхимд нь нүүрсний хулгайн хэрэгт нэр дурьдагдсан сайд байхгүй ёсгүй хэмээн үзэж, Т.Аюурсайханыг явууллаа. 

Харин одоо хоёр жилийн дотор дотор гурван сайдын нүүр үзсэн ХНХ-ны дараагийн сайдыг тодруулах үйл явц үргэлжилнэ. Сар шинийн баяраас өмнө дараагийн сайдын томилох чиглэл барьж байгаа аж. Зарим эх сурвалжуудын мэдээллээр М.Оюунчимэг дээлээ давхарлахаар горилж байгаа гэх. М.Оюунчимэг гишүүний хувьд хүүгээ төрийн өндөр албан тушаалд томилуулсан гэх асуудлаар нэг хэсэгтээ шүүмжлэлд өртсөн. Ерөнхий сайд Л.Оюун-Эрдэнийн хувьд мэргэжлийн гэхээсээ илүү асуудалгүй, авлигын хэрэгт холбогдоогүй нэгнийг сайдаар томилох чиглэл барьж байгаа гэх. Ямартай ч ирэх өдрүүдэд ХНХ-ын хэн толгойлох вэ? гэх асуулт анхаарал татах нь ээ.

П.ГОО