Улаанбаатар хотын түгжрэлийг нэг жилийн дотор нэг төслөөр шийдэх боломж байгааг Нийслэлийн Ерөнхий архитектор Н.Нацагдорж хэлж байна. Хотын дундуур урсдаг Сэлбэ голын эрэг дагуу үерийн далан байгуулах замаар нийслэлийн тулгамдсан асуудлыг шийдэх боломжтой аж. Сэлбэ гол үерийн далангүй шахам. Хотын төв хэсгийн 9 км-т л далан, түшиц ханатай. Голын 70 орчим хувь нь ил задгай урсдаг, стандартын бус шугам сүлжээ, гүүрэн байгууламжаар хааж боосноор урсац нь ч жамаараа явдаггүй.

Тэгвэл “Сэлбэ сэргэлт” төслөөр Сэлбэ голын урсац, хотын түгжрэлийг хамтад нь шийдэх боломж байна. Сэлбэ голын эрэг дагуу нэг талдаа 21.6 км, хоёр талдаа 43.2 км үргэлжлэх далан байгуулна. Гэхдээ энэ далан зөвхөн үер усны хамгаалалт бус. Хотын автозам, инженерийн шугам сүлжээний цогц шийдэл байх юм. Голын эрэг дагуу нэг чиглэлийн хөдөлгөөнтэй, гурван эгнээ зам байгуулна. Зам мэдээж эргэлт, гүүрэн байгууламжтай байна. Бидний хүсээд буй нийтийн тээврийн тусгай замыг ч байгуулах боломжтой.

Сэлбэ голын эрэг дагуу

Автозам-40 км

Унадаг дугуйн зам-43.2 км

Явган зам-43.2 км

Нийтийн тээврийн зогсоол-68

Хонгилын систем-21.6 км үргэлжилнэ.

Дэлхийн бусад нийслэлүүдийн адилаар хотын дундуур урсдаг голынхоо эргийг тохижуулж, амарч зугаалах орчин бүрдүүлэхээс гадна автозамын түгжрэлийг шийдэх гарц байна. Одоогийн замын хөдөлгөөний чиглэлийг өөрчлөх, ил байгаа инженерийн шугам сүлжээг хонгилын системд оруулах зэргээр энэ төсөл цаг хугацаа, хөрөнгө мөнгөний хувьд ч хэмнэлттэй.

 “Сэлбэ сэргэлт” төсөл нь

• Хамгийн богино хугацаанд гүйцэтгэх боломжтой

• Газар чөлөөлөлтийн зардал багатай

• Гол дагуу инженерийн шугам сүлжээг хонгилын системд шилжүүлж, гэр хорооллын барилгажилтыг дэмжих

• Олон тусдаа хийсэн төслүүдийг нэгтгэн хэрэгжүүлэх давуу талтай юм.

Манай хот агаарын бохирдлыг бууруулах, автозамын түгжрэлийг шийдэх, голын урсацыг хамгаалах ажлыг олон жилийн турш харилцан хамааралгүйгээр хийж, их хэмжээний хөрөнгө зарлагадаж ирсэн. Тэгвэл одоо нийгэм, эдийн засгийн хувьд үр ашигтай, байгаль экологи, иргэдэд ээлтэй цогц төслүүдийг хэрэгжүүлж шаардлагатай тулгарч байна.

В.Бат