“Монголын Төмөр зам” компани төмөр замын бүтээн байгуулалт, тээвэрлэлт, шинээр тавих төмөр замын асуудлаар мэдээлэл өглөө.

"Монголын төмөр зам" компанийн захирал П.Ганхүү

Монголын төмөр зам компани 2008 оны гуравдугаар сард байгуулагдсан. Нээгдсэн цагаасаа хойш 15 жилийн нүүрийг үзэж байна. Энэ хугацаанд үндэсний хэмжээний төмөр замын компани байгуулах зорилготой байсан. 

2022 оны сүүлээр Засгийн газраас Монголын төмөр зам компанийг цаасан дээрх компани биш бодитой төмөр замтай болох ёстой гэж үзсэн. Одоогоор 669 хүнтэй үйл ажиллагаагаа явуулж байгаа аж. 

Бид өнгөрсөн оны гуравдугаар сараас арванхоёрдугаар сарыг дуустал нийт 729,5 мянган тонн ачааг “Тавантолгой-Зүүнбаян” чиглэлийн төмөр замаар тээвэрлэсэн. Үүнээс Зүүнбаян-Ханги чиглэлийн төмөр замын бүтээн байгуулалтын ачаа 435,9 мянган тонн, 99,2 мянган тонн сайжруулсан шахмал түлшний түүхий эд-мидлинг, экспортын нүүрс 133,6 мянган тонн болон орон нутгийн тээвэр, хоосон чингэлэг гэх мэт 60,8 мянган тонн ачааг тус тус тээвэрлэсэн.

Энэ жил бид Таван толгой-Зүүнбаян чиглэлийн 5 сая тонн ачаа явуулахаар төлөвлөж байна. Үүний нэг хэсэг нь Таван толгойгоос 300 км Зүүнбаян руу явж байгаад урагшаа Ханги руу салж байгаа. 500 км яваад Таван толгой нүүрс Ханги Мандалаар гарна гэсэн үг.