Улсын Гуравдугаар төв эмнэлгийн Зүрхний төрөлхийн гажгийн багийн бүрэлдэхүүн өнөөдөр уушгины Венийн бүрэн буруу оролт оноштой хоёр сартай нярайд мэс засал эмчилгээг анх удаа бие даан хийж, амь насыг нь аварлаа. Хүүхдийн зүрхний төрөлхийн энэ төрлийн хавсарсан хүнд гажиг нь манай улсад жилд 3-4 тохиолдол оношлогддог бөгөөд Монгол Улсад хараахан эмчлэгдэх боломжгүй хүүхдийн зүрхний төрөлхийн хүнд гажиг өвчний жагсаалтад багтдаг.

УГТЭ өнгөрсөн онд БНСУ-ын Сөүлийн Үндэсний Их Сургууль хоорондын хамтын ажиллагааны хүрээнд зочин профессорын хамтарсан багаар дээрх тохиолдолтой ижил зүрхний төрөлхийн хавсарсан хүнд гажиг оношлогдсон хүүхдэд мэс засал эмчилгээг амжилттай хийж, ажлын байрны мэс засал сургалтуудыг үр дүнтэй зохион байгуулсан юм. Мөн тус эмнэлгийн хүүхдийн зүрхний мэс заслын баг нь 2012-2013 онд БНСУ-ын “Зүрхний сан”-ын дэмжлэгтэйгээр тус улсын Ионсэй Северэнси эмнэлэгт Монгол улсын эрүүл мэндийн салбараас анх удаа багаараа бэлтгэгдсэн өндөр ур чадвартай мэс заслын баг бөгөөд цаашид энэ төрлийн хагалгааг Монгол Улсад бүрэн хийх боломжийг бүрдүүлээд байна.

Тус эмнэлгийн эмч нар Люксембург, Франц, Япон, Солонгос улсуудын хүүхдийн зүрх судасны мэс заслын багтай хамтарч, жилд 5-6 удаагийн ийм төрлийн хамтарсан мэс засал-сургалт зохион байгуулж эмч мэргэжилтнээ сургаж дадлагажуулахын зэрэгцээ, дээрх багуудтай хамтарч жил бүр 20-30 хүүхдэд өндөр өртөгтэй зүрхний мэс заслыг өөрийн эх орондоо хийж байна.