Энэ он дэлхийн нэг өнцөгт үймээн самуунаар эхэлж, нөгөө хэсэгт дайн, дажнаар үргэлжлэв. 2022 онд ОХУ Украинд дайн дэгдээж, Их Британийн хатан хаан таалал төгсөх зэргээр дэлхийг донсолгосон олон үйл явдал болсон бол оны төгсгөлд хүн төрөлхтнийг нэгтгэдэг спортын их наадмуудын нэг Хөлбөмбөгийн ДАШТ болж өндөрлөсөн юм.

1. Казахстаны үймээн 

Нэгдүгээр сарын хоёрны өдөр автомашины газны үнийг эсэргүүцэн эхэлсэн тэмцэл орон даяар өрнөсөн эмх замбараагүй байдал болон хувирсан юм. Энэ үймээний улмаас 238 хүн амиа алдаж, Казахстанд 2-3 тэрбум долларын хохирол учрав. 

2. Бээжингийн олимп 

Хоёрдугаар сарын 4-20-ны хооронд Бээжин хотноо өвлийн олимп болж өнгөрөв. 

3. ОХУ Донбассыг хүлээн зөвшөөрөв

Дайн эхлэхээс гурав хоногийн өмнө буюу хоёрдугаар сарын 21-ний өдөр ОХУ Украины салан тусгаарласан бүсүүд болох, өөрсдийгөө тунхагласан Бүгд Найрамдах  Донецк Ард Улс, Бүгд Найрамдах Луганск Ард Улсын тусгаар тогтнолыг хүлээн зөвшөөрөв. 

4. ОХУ Украин руу довтлов 

Донбасс дахь нөхцөл байдалтай холбоотойгоор ОХУ "цэргийн тусгай ажиллагаа" эхлүүлэхээр болсныг Оросын Ерөнхийлөгч Владимир Путин зарлалаа. Орос, Украины дайн эхлэв. 

5. Хятадын онгоцны сүйрэл 

Гуравдугаар сарын 21-ний өдөр Куньминээс Гуанжоу чиглэн нисэж явсан Хятадын агаарын тээврийн онгоц осолдож онгоцонд байсан 132 хүн бүгд амиа алдав. 

6. Оскарын ёслол дээр гарсан дуулиан 

Оскарын шагнал гардуулах ёслолын үеэр хөтлөгч Крис хүнд өвчний улмаас үс нь унасан эхнэрийг шоглохыг сонссон Уилл Смит тайзан дээр гарч хөтлөгчийг алгадсан нь энэ онд хамгийн их яригдсан сэдэв байлаа. 

7. Шинзо Абэ бусдын гарт амиа алдав 

Долдугаар сарын наймны өдөр Японы Ерөнхий сайд асан Шинзо Абэ бусдын гарт амиа алдав

8. Нэнси Пелос Тайваньд айлчлав 

АНУ-ын Төлөөлөгчдийн танхимын тэргүүн Нэнси Пелоси наймдугаар сарын хоёрны өдөр Тайваньд айлчлав. Энэ нь Хятад, Тайвань, АНУ-ын харилцаа дахин хурцдах шалтгаан болсон бөгөөд Пелосигийн айлчлалын үеэр Хятад пуужингуудыг бэлэн байдалд оруулж байлаа. 

9. Хатан хаан II Элизабет таалал төгсөв 

Их Британийн хатан хаан II Элизабет есдүгээр сарын наймны өдөр 96 насандаа таалал төгсөв. Түүний орыг хүү нь залгамжилж, III Чарльз хаан болон өргөмжлөгдлөө. 

10. Ираны эсэргүүцэл 

Хижаб буруу өмссөн гэсэн шалтгаанаар саатуулагдаж, улмаар нас барсан Махса Амини бүсгүйн үхлийн дараа иран эмэгтэйчүүд эрхийнхээ төлөө тэмцсэн нь орон даяар эсэргүүцэл, эмх замбараагүй байдал дэгдэх эхлэл болов. Удаан үргэлжилсэн энэ эмх замбараагүй байдлын улмаас 500 гаруй хүн амиа алдаж, 15000 хүн баривчлагджээ. 

11. Индонезийн эмгэнэлт хэрэг 

Аравдугаар сарын нэгний өдөр Индонезийн цэнгэлдэх хүрээлэнд хөлбөмбөгийн тэмцээний үеэр үймээн үүсэж, олны хөлд дарагдан 182 хүн амиа алдав. 

11. Итэвоны эмгэнэлт хэрэг

Хэллоуиний баяр тэмдэглэх үеэр Сөүлийн Итэвон дүүрэгт хэт олон хүн цугларсны улмаас хүмүүс дарагдаж, 18-30 насны 150 хүн амиа алдав. 

12. Бид найман тэрбумуулаа болов 

Энэ оны 11 дүгээр сарын 15-ны өдөр дэлхийн хүн ам 8 тэрбум болсныг НҮБ зарлав. Дэлхийн хүн ам 7 тэрбумаас 8 тэрбум болох хүртэл 12 жилийн хугацаа шаардагджээ. 

13. Катар-2022

Катар-2022 хөлбөмбөгийн дэлхийн аварга шалгаруулах тэмцээн 11 дүгээр сарын 20-12 дугаар сарын 18-ны хооронд зохион байгуулагдав. Ойрх Дорнодод анх удаа болсон энэ ДАШТ-ийн цомыг Аргентины баг өргөсөн юм. 

14. Цагаан цаасны хувьсгал 

Гурван жил орчмын хугацаанд ковидын хатуу хязгаарлалтад амьдарсан хятадуудын тэсвэр алдагдаж 12 дугаар сарын эхээр эсэргүүцэлд нэгдэв. Цензурээс зайлсхийн хоосон цаас барин жагсах хүн олон байсан тул энэ эсэргүүцлийг "Цагаан цаасны хувьсгал" хэмээн хэвлэлүүдээр мэдээлж байлаа. 

15. Домог халив

Дэлхийн хөлбөмбөгийн домог Пеле 12 дугаар сарын 29-ний өдөр 82 насандаа хүнд өвчний улмаас таалал төгсөв.