УИХ дахь АН-ын бүлгээс АН-ын Эв нэгдлийн ажлын хэсгийг байгуулж буйгаа өнгөрсөн даваа гаригт зарлаж, ажлын хэсгийн гишүүдэд батламж гардуулсан. Тус ажлын хэсэгт бүлгийн гишүүдээс гадна С.Эрдэнэ, Х.Баттулга, Ц.Элбэгдорж, Н.Алтанхуяг, З.Энхболд, С.Баярцогт нар багтаж буйг мэдээлж байв.

Тэгвэл өнөөдөр С.Эрдэнэ мэдээлэл хийж, уг ажлын хэсгийг үгүйсгэлээ. Тэрбээр ийм ажлын хэсэг байгуулаагүй, өөрөө багтаагүй гэдгийг хэлэв.

АН-ын дарга С.Эрдэнэ: АН-аас зөвлөлдөх, эвсэх шийдвэр гараагүй. УИХ дахь АН-ын бүлэг гэгч байгууллага бол эрх баригчдын тоглоомын бүлэг. Луйварын замаар Үндсэн хуулийн нэмэлт хийх үйл ажиллагаандаа АН-ын бүлэг гэж өөрсдийгөө нэрлээд байгаа этгээдүүдийг улс төрийн наймаа замаар ашигласан.

УИХ-ын хуульд УИХ-ын бүтцийг байгууллагыг давхардуулж байгуулахыг хориглосон байдаг. Гэтэл өнөөдөр УИХ-ын дарга нь өөрөө хууль зөрчсөн үйл ажиллагаа явуулж, УИХ дахь АН-ын бүлгийг хоёр мэтээр зарлаж байгаа нь байж боломгүй, ёс суртахуунгүй ажил.

АН-ын бүлгийн даргаар Д.Ганбат ажиллаж байгааг АН-ын даргын хувиар хариуцлагатайгаар хэлье. Дээд шүүхийн эцсийн шийдвэр гараагүй байхад УИХ дахь хууль ёсны бүлэг татан буугдахгүй” гэсэн байр суурийг илэрхийллээ.

Мөн тэрбээр АН-ын Эв нэгдлийн ажлын хэсгийн зөвлөхөөр ажиллана гэх экс Ерөнхийлөгч Х.Баттулга нь АН-ын гишүүн биш гэдгийг нэмж хэллээ.

Б.Хэрлэн