Эрх баригчид зуны сүүл сараас эхлэн өвөлжилтийн бэлтгэлийг бүх л түвшинд хангах үүрэг өгч, энэ үүргээ тоть шиг давтсан. Гэтэл өвлийн сар дундаа орж байхад нийслэлийн зарим дүүрэг өвөлжилтийн бэлтгэлээ хангалтгүй базааснаа хүлээн зөвшөөрөөд эхэлсэн бололтой. Тухайлбал, нийслэлийн Хан-Уул дүүрэг зам цэвэрлэгээний давс худалдан авах тендер зарласан байна. 

Өнгөрсөн баасан гарагт хотын дарга өвөлжилтийн бэлтгэл ажлыг хангах, халтиргаа гулгааг арилгах чиглэлээр ажиллахдаа холбогдох байгууллагууд, дүүргийн удирдлагууд хоорондоо уялдаа холбоо сул, зохион байгуулалтын хувьд алдаа гаргасныг онцолж, яаралтай арга хэмжээ авахыг үүрэг болгосон. Энэ үүрэг өгөгдсний дараа буюу энэ сарын 27-ны өдөр буюу өчигдөр Хан-Уул дүүрэг ийнхүү давс худалдаж авах тендер зарлажээ. Уг нь бол өвөлжилтийн бэлтгэл ажлыг хангах хүрээнд өнгөрсөн намар энэхүү тендер зарлагдаж, давсны нөөцийг бүрдүүлсэн байх ёстой. Гэвч цас орж, халтиргаа гулгаа дээд цэгтээ хүрсэн өдрүүдэд Хан-Уул дүүрэг давс авахаар яаран тендер зарлаж байгаа нь энэ.