Хэллоуин баярыг тэмдэглэх үеэр 10 дугаар сарын 29-ний үдэш Сөүлийн Итэвон дүүрэгт хэт олон хүн цугларч, шахцалдсаны улмаас хүмүүс дарагдаж олноороо амиа алдсан харамсалтай хэрэг гарч байсан. Энэ эмгэнэлт үйл явдлын улмаас 158 хүн амиа алдсан юм.

Олон хүний амь насыг авч одсон энэ хэрэгтэй холбоотойгоор Сөүлийн Йонсан захиргааны тойргийн тэргүүнийг 12 дугаар сарын 26-ны өдөр баривчилсан байна. Түүнийг ажил үүрэгтээ хайхрамжгүй хандсан нь хүмүүс амиа алдах, бэртэж гэмтэх шалтгаан болсон, Хэллоуин баярын үеэр хүмүүс олноор цуглахаас өмнө зохих арга хэмжээ аваагүй гэсэн шалтгаанаар Йонсан тойргийн тэргүүн Пак Хи Ёныг баривчилсан гэж KBS телевиз мэдээлжээ. 

Йонсан захиргааны тойргийн Итэвон дүүрэгт 158 хүн амиа алдсан эмгэнэлт хэрэгтэй холбоотойгоор Өмнөд Солонгосын цагдаагийнхан мөрдөн шалгах ажиллагаа явуулж байгаа  юм. 

Энэ хэрэгтэй холбоотойгоор албан тушаалтнуудыг шалгах явцад захиргааны тэргүүн өөрийг нь хэрэгт холбоотойг нотлох баримтуудыг устгаж болзошгүй гэж хууль сахиулагчид үзсэний улмаас Йонсан захиргааны тэргүүн Пак Хи Ёныг баривчлан саатуулах шийдвэр гаргажээ. Өмнөд Солонгосын хэвлэлүүдийн мэдээлснээр, хэрэг болсны дараа Пак шинэ гар утас авч, хуучин утаснаасаа мэдээллүүдийг устгасан гэдгийг мөрдөн байцаагчид тогтоосон байна. 

Мөн даваа гарагт тухайн нутаг дэвсгэрийн аюулгүй байдлын арга хэмжээг хариуцдаг нэг албан тушаалтан баривчлагдсан байна. Үүнээс өмнө, цагдаагийн газрын дөрвөн өндөр албан тушаалтныг Итэвоны хэрэгтэй холбоотойгоор баривчилсан бөгөөд тэдний дунд Йонсан тойргийн цагдаагийн газрын дарга асан ч багтаж байгаа аж.

Г.Бямбасүрэн