Украины ард түмэнтэй эв санаа нэг, тэднийг дэмжиж байгааг илэрхийлсэн "Украины цаг" нэртэй арга хэмжээнд нэгдэж байгаа талаар тус улсын Ерөнхий сайд асан Борис Жонсон Твиттер хуудсандаа бичжээ. Евроньюс агентлагийн мэдээлснээр, 12 дугаар сарын 21-ний үдэш дэлхийн олон хотод энэ арга хэмжээнд нэгдэж, гэрэл эсвэл баярын чимэглэлээ унтраасан бөгөөд арга хэмжээнд нэгдэх уриалгыг Борис Жонсон ч хүлээн авсан талаараа ийнхүү цахим хуудсаараа дамжуулан мэдээлсэн байна. 

"Орос улс Украин руу хууль бусаар, зэрлэгээр түрэмгийлсний улмаас олон сая украин хүн эрчим хүч, ундны ус, амин чухал зүйлсээ алдсан. Би өнөөдөр 20:00 цагт болох "Украины цаг"-ийг дэмжиж, тэдэнтэй эв санаа нэг байгаагаа илэрхийлж байна. Украин ялаг!" хэмээн Борис Жонсон бичжээ. 

CNN агентлагийн мэдээлснээр, Их Британийн нийслэл Лондон хотын Уэмбли цэнгэлдэх хүрээлэнгийн  гэрэл, Ромын Колизей, Сиднейн дуурийн театр болон Торонто дахь CN Тауэр цамхагийн гэрлийг болон Латвийн төв талбайн гэрлэн чимэглэлийг  "Украины цаг" арга хэмжээний хүрээнд унтраасан байна.

"12 дугаар сарын 21-нд оны хамгийн урт шөнө тохионо. Гэхдээ энэ өдөр маргаашнаас өдөр уртсаж, гэрэл их болох тул энэ өдөр хар хүчний ялагдлын өдөр болно" хэмээн Украины Дотоод хэргийн сайдын зөвлөн Антон Геращенко Телеграм хуудсандаа бичжээ.

Украины ард түмэнтэй эв санаа нэг гэдгээ харуулах "Украины цаг" арга хэмжээг Европын зөвлөл ч мөн дэмжин, нэгдсэн байна.

Г.Бямбасүрэн