Перугийн Ерөнхийлөгч асан Педро Кастильогийн эхнэр хүүхдүүдийг гадаад орныг зорихыг зөвшөөрчээ. Тэд өмнө нь Мексикээс улс төрийн орогнол хүссэн аж. Улмаар тэднийг Мексик рүү явахыг зөвшөөрсөн гэж Перугийн Гадаад хэргийн яам мэдэгджээ. 

Перугийн Гадаад хэргийн яамны онцолсноор "Олон улсад хүлээсэн үүргийн дагуу"  эдгээр хүмүүст зохих зөвшөөрлийг олгосон бөгөөд энэ баримт бичгийн дагуу орогнол хүссэн хүмүүс Перуг орхин явах боломжтой аж. 

Эргэн сануулахад, 12 дугаар сарын эхээр өөрт нь импичмент зарлахаар зэхэж байсан парламентыг Кастильо татан буулгана гэж зарласан юм. Гэсэн ч Перугийн парламент шуурхай хуралдан түүнд импичмент зарласны дээр үймээн самуун дэгдээсэн, эрх мэдлээ хэтрүүлэн ашигласан гэж буруутган баривчилсан. Үүний дараа дэд Ерөнхийлөгч Дина Болуарте Конгресс дээр төрийн тэргүүний тангараг өргөснөөр энэ улсын анхны эмэгтэй ерөнхийлөгч болсон юм.

Г.Бямбасүрэн