Олон улсын хөлбөмбөгийн холбоо (FIFA) ирэх 2026 оны дэлхийн аваргын тэмцээний хэлбэрийг эргэн авч хэлэлцэхээр болсон тухайгаа мэдэгдлээ. 

Олон улсын хөлбөмбөгийн холбооны тэргүүн  Жанни Инфантино хэлэхдээ, тэмцээний шигшээд Катарынх шиг 32 баг биш 48 баг тоглохоор болж байна. Тэрбээр “Энд бид хэсгийн тоглолтуудад олон үзүүштэй өрсөлдөөнийг харж авлаа. Бид цаашид багуудын тоог 48 хүртэл өргөжүүлэх  тал дээр санал солилцож байна. Дөрвөн багтай 12 хэсэг эсвэл гурван багийн 16 хэсэгийн аль нь дээр вэ гэдэг дээр мөн санал хүсэлтээ солилцох болно. Ямартай ч ОУХБХ-ны Зөвлөлийн дараагийн хуралдаанаар үүнийг авч хэлэлцэнэ" хэмээв.  

Мөн Инфантино Катарт болсон ДАШТ-ийг “Энэ удаагийн тэмцээнээр ер бусын эвлэлдэн нэгдэх чадвар харагдлаа. Дараа дараагийн ДАШТ энэ хэлбэрээр энх тайван, эв нэгдэлтэй болох болно. Тиймээс цаашдаа ДАШТ-ыг илүү сонирхолтой, хүртээмжтэй, олонд хүргэхийн тулд олон талаас нь харж ажиллах болно" гэж тэмцээний талаарх сэтгэл ханамж мөн санал хүсэлтээ хуваалцсан юм.