Украин руу 2023 оны өвөл дахин давшихаар бэлдэж байж магадгүй, гэхдээ ийм давшилт амжилттай болно гэдэг нь магадлал багатай гэнэ. Ийм таамаглалыг Америкийн дайн судлалын хүрээлэн гаргажээ. 

Украины албаны этгээдүүд болон Кремлийн мэдэгдэл, үйлдлүүдээс харахад Владимир Путин Украинд тавьсан зорилгоосоо буцаагүй байгаа нь илт гэж Дайн судлалын хүрээлэнгийн шинжээчид онцолсон байна. Путин Оростой хэлэлцэх хэлэлцээрийн ширээний ард украинчуудыг суулгаж, Москвагийн тулгасан болзлуудыг хүлээн зөвшөөрүүлэхийн тулд төрөл бүрийн арга ашигласан хэвээр байна гэж шинжээчид мэдэгджээ. 

Шинжээчдийн үзэж байгаагаар, өдгөө Донецк мужид давшиж байгаа, Украины дэд бүтцэд их хэмжээний пуужингийн цохилт өгсөөр байгаа зэрэг нь Украинаас хэлэлцээрийн болзлыг хүлээн зөвшөөрөхийг шаардаж байгаа хэлбэр гэнэ. Гэсэн ч Киев болзол тулгасны хариуд хэлцэл хийх төлөвлөгөөгүй байгаагийн улмаас Путин 2023 оны өвөл шинээр давшиж, гуравдахь цэргийн ажиллагаагаа эхлүүлж болзошгүй гэж Дайн судлалын хүрээлэн үзжээ.

Г.Бямбасүрэн