Оросын Ерөнхийлөгч Владимир Путин дайнд ялж чадахгүй, тиймээс Оросын дарангуйлагч үүнийгээ хэдий чинээ хурдан ухаарч, Украинаас цэргээ татна, төдий чинээ өөрөө болон хүрээлэл нь удаан амьдарна гэж Украины Ерөнхийлөгч Володимир Зеленский мэдэгджээ. Тэрбээр энэ талаар The Economist сэтгүүлд ярилцлага өгөх үеэрээ мэдэгдсэн байна. 

"Дайн. хурдан дуусаж, Орос улс энэ дайныг эхлүүлэх нь эмгэнэлтэй алдаа байсан гэдгийг хэдий чинээ хурдан ухаарна төдий чинээ удаанаар Оросын ерөнхийлөгч болон түүний хүрээлэл удаан амьдарч чадна" хэмээн Зеленский онцолжээ.

Путин энэ дайнд ялагдана гэдэгт Украины Ерөнхийлөгч бүрэн итгэлтэй байгаа аж. Түүнчлэн Украин улс 1991 оны үеийн хилээрээ нутаг дэвсгэрээ эргүүлэн олж авах ёстой, эс тэгвэл түрэмгийлэгч дахин довтолно гэж Зеленский үзэж байгаагаа илэрхийлжээ.Мөн гагцхүү Путин өнөөгийн дайныг зэвсгийн хүчээр шийдэх биш дипломат аргаар шийдэх замд оруулж чадна гэж онцолсон байна. 

"Одоо тэр 1991 оны үеийн хилээс холдвол дипломат арга замаар асуудлыг шийдэх боломж гарч ирэх юм. Зэвсгийн хүчээр биш дипломат арга замаар шийдэж чадах хүн нь гагцхүү тэр. Чухамхүү Путин л үүнийг хийж чадна" хэмээн Зеленский мэдэгджээ.

Энд дуулгахад, хоёрдугаар сарын 24-ний өдөр эхэлсэн дайн 10 сар үргэлжилсэн ч төгсгөл нь харагдахгүй л байна. Дайн эхэлснээс дөрөв дэх өдөр талууд анхны хэлэлцээ хийж, хамгийн сүүлд гуравдугаар сард Туркэд хэлэлцээ хийсэн ч төдийлөн амжилтад хүрээгүй, үүнээс хойш хэлэлцээ зогсонги байдалд орсон юм. Тодруулбал, ОХУ хоёрдугаар сарын 24-ний өдөр "цэргийн тусгай ажиллагаа" нэрийн дор Украин руу халдсанаас хойш дөрөв дэх өдөр нь буюу хоёрдугаар сарын 28-ны өдөр сөргөлдөгч хоёр талын анхны хэлэлцээ болж байлаа. Энэ хэлэлцээ хэд хэдэн үе шаттайгаар болж, хамгийн сүүлд Туркийн зуучлалтайгаар энэ улсад болсон ч ямар ч үр дүнд хүрэлгүй зогсонги байдалд ороод есөн сарын нүүр үзэж байна.

Сүүлийн үед хэлэлцээ сэргэж магадгүй талаарх мэдээлэл үе үе гарах болсон ч Украины тал хэлэлцээ мөд эхлэхгүй гэдгийг илтгэх мэдэгдлүүд хийсээр байгаа юм. Хоёр тал дахин хэлэлцээ хийхийн тулд Украин 1991 оны үеийн хилийн зурвасаа нутаг дэвсгэрээ эргүүлэн авсан байх ёстой гэж Украины эрх баригчид удаа дараа мэдэгдсэн. Харин Оросын тал хэлэлцээ хийхэд болзол хүлээж авахгүй, тэр дундаа Оросын цэргүүдийг эргүүлэн татах асуудлыг хөндөхгүй хэмээн мэдэгдэж байв.

Г.Бямбасүрэн