Америкийн бизнесмен Илон Маск Тесла компанийнхаа олон сая хувьцааг заржээ. Энэ талаар АНУ-ын Үнэт цаасны комиссоос авсан мэдээлэлтэйгээр Ройтерс агентлаг мэдээлсэн байна. 

Эх сурвалжийн мэдээлснээр, Илон Маск даваа гарагаас эхлэн Тесла компанийн хувьцаануудыг зарж эхэлсэн бөгөөд нийт 22 сая хувьцааг тус бүр нь 156-176 долларын үнэтэйгээр, нийт 3,6 тэрбум доллараар заржээ. 

Тесла компанийн хувьцаа өнгөрсөн сард огцом унаж, улмаар энэ нь Маскийн хөрөнгөнд ихээхэн нөлөөлж байв. Блүмберг агентлагийн мэдээлснээр, 11 дүгээр сарын 22-ны өдрийн байдлаар Илон Маскийн хөрөнгө 2022 он эхэлснээс хойш 100 тэрбумаар буурсан бөгөөд энэ нь Тесла компанийн хувьцаа сүүлийн хоёр жилд байгаагүйгээрээ унасантай холбоотой юм. 

Г.Бямбасүрэн