Хятадын компанид хамаарах ТикТок олон нийтийн сүлжээг дэлхийн хэд хэдэн орон хориглож байсан. Хамгийн сүүлд гэхэд л Тайванийн эрх баригчид ТикТок сүлжээ ашиглахыг төрийн албан тушаалтнуудад хориглож байв. 

Энэ удаад АНУ ТикТок сүлжээг хориглохоор зэхэж байна. Ройтерс агентлагийн мэдээлснээр, Хятадын ByteDance компанийн ТикТок сүлжээ, мөн Орос, Иран, Куб болон өөр хэд хэдэн орны олон нийтийн сүлжээг хориглох хуулийн төслийг АНУ-ын конгресст өргөн барьсан байна. 

Хуулийг төслийг Бүгд Найрамдах намаас сонгогдсон сенатч Марко Рубио боловсруулж, түүний намын Майкл Галлахер, ардчилсан намын гишүүн Ража Кринамурти нар дэмжжээ. 

Олон нийтийн сүлжээгээр дамжуулан бусад улс орнууд америкчуудын мэдээлэлд хяналт тавьж, контентод нөлөөлөн, суртал ухуулга явуулах боломжтой гэж үзсэний улмаас ийм хуулийн төсөл боловсруулсан талаар Марк Рубио мэдэгджээ. 

Мөн энэ долоо хоногт АНУ-ын Алабама, Юта мужуудад төрийн байгууллагын төхөөрөмж, мужийн төрийн байгууллагын компьютерийн сүлжээнд ТикТок сүлжээг ашиглахыг хориглосон юм. Үүнээс өмнө Техас, Мэриленд, Өмнөд Дакота ийм шийдвэр гаргаж байв.

Г.Бямбасүрэн