Хятад улс тэг ковид бодлогоо цуцалж, удахгүй хилийн зорчигч тээврийн хөдөлгөөнийг нээнэ гэсэн мэдээлэл гарч байсан. Энэ мэдээллийг Хятадын Харбин дахь Оросын Ерөнхий консулын газар няцаасныг Регнум агентлаг дамжуулжээ. 

Өмнө нь Хятадын олон нийтийн сүлжээгээр Хятад-Оросын хил 2023 оны хоёрдугаар сарын хоёрны өдрөөс эхлэн зорчигчийн урсгалыг нээнэ гэсэн мэдээлэл гарч байлаа. Энэ мэдээлэлд хавсаргасан мэдэгдлийн зураг нь 2020 оны шинэ жилийн баярын үеэр хэрхэн ажиллах талаарх мэдэгдэл байсан гэж Харбин дахь Оросын Ерөнхий консулын газар мэдэгджээ. 

Одоогоор Хятадын хилээр гагцхүү ачаа тээврийг хэвийн нэвтрүүлж байгаа юм. БНХАУ хилээ нээж, хятад жуулчид олон улсыг зорих боломжтой болох талаарх төрөл бүрийн мэдээлэл Хятадын олон нийтийн сүлжээгээр гарсаар байгаа ч энэ мэдээллийг батлах албан ёсны мэдээлэл гараагүй л байна.

Г.Бямбасүрэн