Өөрөөр нь төлүүлье хэлэлцүүлэгт Хан-Уул дүүргийн ИТХ-ын төлөөлөгч Б.Жагар оролцож, өөрийн байр сууриа илэрхийллээ. Тэрбээр үгээ “Сайн байцгаана уу, эрхэм хүндэт хулгайч нар аа” хэмээн хэлэлцүүлэгт оролцож буй УИХ-ын гишүүдтэй мэндэлснээр эхэллээ.

Б.Жагар “УИХ-ын гишүүд хулгай хийдэг дамжаа төгсдөг болж, тэрийгээ хуульчилдаг боллоо. Эсвэл хуулиа хүчингүй болгож байгаад үгсэн хуйвалдаж, хулгай хийдэг боллоо. Х.Ганхуяг, Г.Дамдинням, С.Бямбацогт нар ямар бизнес эрхэлдэг юм бэ. Тэдэнд Монгол Улс ямар өртэй юм бэ” хэмээн асууж байна.

Мөн тэрбээр “Монголын парламент, Засгийн газар, хууль хяналтын байгууллага ажлаа үнэн зөв хийж байсан бол бид өнөөдөр сайн сайхан зүйл ярих байлаа. Бизнес эрхлэгчдийн мөрөөдлийг дэмжих байв. Гэтэл өнөөдөр Монголын ард түмэн төр засгаа шүүгээд сууж байна.  Ийм болтлоо шившгийн хөндий болж байна” гэсэн байр суурийг илэрхийллээ.