С.Эрдэнэ тэргүүтэй АН-ынхан мэдээлэл хийлээ. Тэд 32 тэрбумын хөшөө, хөгшдийн тэтгэвэр, Хөгжлийн банк, хүний эрх, улс төрийн нам, улсын төсөв, төрийн хариуцлага, Үндсэн хуулийн нэмэлт өөрчлөлт, хоригдож буй Э.Бат-Үүл, УИХ-ын намрын чуулган, Ерөнхий сайдаас нэхэх хариуцлага зэргээр Монголын нийгмийн бүх асуудалд, тун өргөн хүрээнд “санаа зовж” байна. Товчхондоо хорвоогийн хамаг асуудлыг хамж шимсэн өнөө л явуургүй улс төр.

Хоёр хуваагдаж, ээлж дараалан мэдээлэл хийдэг ч үнэндээ тэдний ярианд ажил хэрэгч санал санаачилга байдаггүй. Эрх баригчдын өчигдрийн ярьсан асуудлыг өнөөдөр улстөржүүлдэг. Ерөнхийлөгч өчигдөр Засгийн газарт тэтгэвэр, тэтгэмж нэмэх чиглэл өгөхөд өнөөдөр АН-ынхан тэр асуудлыг шүүрэн авч, инфляцитай уялдуулан нэмэх ёстой хэмээн хэвлэлийн хурал хийж байх жишээний.

Парламентад суудалтай, Монголын улс төрийн хоёр дахь тоглогч нам ч тэд эрх баригчдыг дагаж улстөржихөөс өөрийг хийдэггүй. Улс төрийн нам улстөржих нь гажуудал биш. Гэхдээ хийрхсэн, эрх баригчийг дагаж далдайсан улс төр биш хүчтэй сөрөг хүчин хэрэгтэй байна.

Б.Хэрлэн