Хэнтий аймгийн Дадал суманд “Дэлүүн болдог” шинэ нисэх буудал баригдаж эхэлжээ. Энэхүү бүтээн байгуулалт Хэнтий аймгийг аялал жуулчлалын бүс болгох бодлогын хүрээнд хийгдэж буй аж. Шинэ нисэх буудлын талаар Хэнтий аймгийн “Өндөрхаан”  Нисэх буудлын дарга Д.Цэрэндондовоос тодрууллаа.

-Дадал суманд “Дэлүүн болдог” шинэ нисэх буудал баригдаж эхэлжээ. Ямар хэмжээний хөрөнгө оруулалттай бүтээн байгуулалт вэ?

- Улсын төсвийн 4.8 тэрбум төгрөгөөр баригдаж байна.

-Нисэх буудлын эдийн засгийн үр өгөөжийг хэрхэн тооцож байгаа вэ?

-Шинэ нисэх буудал Ерөнхий зориулалтын нисэхийг хөгжүүлэх бодлого болон аялал жуулчлалыг дэмжих зорилгын  хүрээнд баригдаж байна. Их Эзэн Чингис хааны түүхт аялал жуулчлалын үндэсний парк байгуулах ажилтай уялдуулж, жуулчдыг тохилог шинэ буудалд хүлээж авахаар ажилдаа ороод байна.

-Нисэх буудлын ямар хүчин чадалтай байх вэ?

-Цагт 100 хүнд үйлчлэх хүчин чадалтай. Одоо ашиглаж байгаа буудал 50 хүнд үйлчлэх хүчин чадалтай. Шинэ буудал ашиглалтад орсноор хүчин чадал хоёр дахин нэмэгдэнэ.

-Хэзээ ашиглалтад орох вэ?

-2022 оны нэгдүгээр улиралд ашиглалтад орно. Энэ жил бүтээн байгуулалтын ажлыг нэлээн ахиулах төлөвлөгөөтэй байгаа. Бүтээн байгуулалтын ажлыг "Биг Монголиа билдинг" ХХК гүйцэтгэж байна.

-Аймгийн төвд мөн шинэ нисэх буудал баригдаж байгаа байх?

-Аймгийн төвд Кувейтийн сангийн буцалтгүй тусламжаар цагт 100 хүн хүлээн авах хүчин чадалтай нисэх буудал баригдаж байгаа. Нисэх буудал 1980-аад онд баригдсан цаг уурын барилгад үйл ажиллагаа явуулж байсан. Барилга ашиглалтын шаардлага хангахгүй, нуралт өгсөн учраас Төрийн өмчийн хорооноос акталсан.

В.Бат