Нийслэлийн мэргэжлийн хяналтын газраас согтууруулах ундаагаар үйлчлэх тусгай зөвшөөрлөө бусдад түрээслүүлсэн зөрчлийг илрүүлсэн байна.

Тодруулбал, Сүхбаатар дүүргийн цагдаагийн газрын хоёрдугаар хэлтсээс "Тахилга" ХХК-д холбогдуулан зөрчлийн хэрэг нээжээ. Үүний дагуу мэргэжлийн хяналтын улсын байцаагч зөрчил шалган шийдвэрлэх ажиллагааг явуулахад Сүхбаатар дүүргийн 10 дугаар хороонд байрлах "Топаз" төвийн караоке баарын үйл ажиллагаа эрхлэгч иргэн А нь "Тахилга ХХК"-ийн “СОГТУУРУУЛАХ УНДААГААР ҮЙЛЧЛЭХ ТУСГАЙ ЗӨВШӨӨРӨЛ”-өөр түрээсийн гэрээ байгуулан үйл ажиллагаа явуулж байжээ. 

Иймд "Тахилга" ХХК-ийн гаргасан согтууруулах ундаагаар үйлчлэх зөвшөөрлийг бусдад шилжүүлсэн зөрчилд Зөрчлийн тухай хуулийн 6.5 дугаар зүйлийн 8 дахь хэсэгт заасны дагуу хууль бусаар олсон хөрөнгө, орлого болох 1,0 сая төгрөгийг улсын орлого болгон, үйл ажиллагааг зогсоож, тусгай зөвшөөрлийг хүчингүй болгож, хуулийн этгээдийг торгох шийтгэлийг оногдуулсан байна. 

Э.Үүрийнцолмон