Олон улсын олимпийн хорооноос Үндэсний олимпийн хороодод олимпийн наадамд оролцсоны төлөө олгох санхүүжилтээ (46,7 сая ам.доллар байсан) нэмж 57 сая ам.доллар болголоо. Анх төлөвлөж байсан санхүүжилтийг 10,3 саяар өсгөж буйн гол шалтгаан нь “Токио-2020” олимпийн наадмыг бүтэн жилээр хойшлуулсантай холбоотой юм. Таван тивийн 206 орны ҮОХ-д уг санхүүжилтийг авах хүсэлтээ ОУОХ-нд албан ёсоор гаргах ёстой юм байна.

ҮОХ-дын олимпийн наадмаас өмнөх болон наадмын үеэрх тээвэр, зочид буудлын зардлыг ОУОХ хариуцдаг бөгөөд олимпод оролцсон тамирчид, дасгалжуулагч, албаны хүмүүсийн онгоцны тийз, олимптой холбогдох зардлыг олгодог ажээ.

Мөн Олимпийн эв санааны нэгдлийн сангаас 185 орны 1600 тамирчны бэлтгэлжилтэд зориулж олгодог тэтгэлгээ нэг жилээр сунгаж, үүнд 15 сая ам.долларыг гаргахаар шийдвэрлээд байгаа юм.

Эх сурвалж: www.olympic.org