Олон улсын их мастер Р.Манлай дэлхийн 7 удаагийн аварга даамчин И.Куперманы шилдэг бүтээл болох “Практик комбинац” хэмээх цуврал номын эхний хоёр дэвтрийг орчуулан гаргажээ.

Дэлхий дахиныг хамарсан коронавируст халдварын улмаас спортын бүх тэмцээн, уралдаан цуцлагдаад, тамирчид гэр гэртээ бэлтгэл хийж, спортын заал танхим эзгүйрээд байгаа билээ. Харин энэ үеийг үр бүтээлтэй ашиглан, Монголын даамын холбооны ерөнхий нарийн бичгийн дарга Р.Манлай даам сонирхогчдод ийнхүү хоёр шинэ номоор бэлэг барьж байна. Тус номд 31 болон 32 дугаар буудлаас эцсийн цохилт хийж буй 750 орчим бодлого бүхий тоглолтын үеэр тохиолдсон практик жишээнүүд байгаа аж.

Зохиогч болон авторуудын нэрийг кириллээр хөрвүүлж, бодлогын шийдийг шалгахад хялбарыг бодолцон арын хуудсанд хариуг нь бичсэн байна. Их мастер Р.Манлай 2017 онд "Александр Балякин: Шилдэг 10 өрөг", 2018 онд "Гадсан байрлалын цохилтууд", "Сонгомол байрлалын цохилтууд" номыг орчуулан хэвлүүлж даам сонирхогчдод толилуулсан юм.

М.Бүүвэй