"Монгол Шуудан" компанийг 2016 онд хувьчилж, 34 хувийг нь Хөрөнгийн биржээр зарах шийдвэр гарсан байдаг. Улмаар “Ард Санхүүгийн Нэгдэл” ХХК болон тус компанийн хувьцаа эзэмшигчид 17 хувийг нь худалдаж авсан билээ.
УИХ-ын гишүүн Т.Аюурсайхан өчигдөр /2020.02.11/ өөрийн цахим хуудаснаа 2016 оны намар “Монгол Шуудан” хувьцаат компанийг 20 тэрбум төгрөгөөр хувьчлах Тогтоолын төсөл УИХ-д орж ирэхэд нь ганцаараа ч гэсэн уйгагүй эсэргүүцэж, судалгаа тооцоо, үндэслэл дэвшүүлсээр зогсоож чадсан юм. Үүнтэй адил Төрийн банк, МИАТ ХК-ийн луйврын хувьчлалыг мөн зогсоож чадсан юм. Өнгөрсөн хугацаанд төрийн өмчийг санаатайгаар үнэгүйдүүлж, алдагдалд оруулж, улмаар хэт бага үнээр хувьчилдаг луйварт цэг тавьж, иргэд олон нийтийнхээ нүд, чих, оюун тархи нь байхыг хичээж байна” хэмээн нийтэлсэн байна.
Үүнтэй холбогдуулан “Ард Санхүүгийн Нэгдэл” ХК-ийн гүйцэтгэх захирал Ч.Ганхуяг өөрийн байр сууриа илэрхийллээ. Тэрбээр “Т.Аюурсайхан олон нийтэд хандаад шоу хийсэн байна. Хувьчлал буруу явагдсан, олон нийтийн өмчийг хулгай хийсэн. Намайг “Монгол шуудан” компанийг хувьчлах гэж улайран дайрсан гэжээ. Энэ хүн төрийн түшээ хүн. Үгээ цэгнэх ёстой. Төр засгийн бодлогыг шууд нулимах эрх Аюурсайханд байхгүй.
Т.Аюурсайхан “Монгол Шуудан” компани маш өндөр ашигтай ажиллаж байхад нь бид ороод хамаг ашгийг нь хамаад сууж байгаа мэт зүйл ярьжээ.
2015 оны 12-дугаар сард “Монгол Шуудан”-ийн хувьчлалыг Ардчилсан намын тухайн үеийн дарга З.Энхболд удирдаж, Ч.Сайханбилэгийн Засгийн газар хэрэгжүүлсэн. Монголчуудыг анх удаа нээлттэйгээр, уриалан дуудаж байгаад энэ хувьчлалыг явуулсан. “Монгол Шуудан” компани 95 сая төгрөгийн ашигтай ажиллаж байсан бол 2016 онд шууд ашигтай ажиллаж эхэллээ. Үүнээс хойш ашиг огт буураагүй. “Монгол Шуудан”-ийн түүхэнд анх удаа 2017 онд ногдол ашиг өгсөн. Өнөөдөр 2020 оны хоёрдугаар сард 1.1 тэрбум төгрөгийн ашиг хийсэн. Орлого нь хувьчилснаас хойш 50 хувиар өссөн байна. Хүргэлтийн үйлчилгээ шинэ түвшинд хүрч, өдрийн дотор хүргэж чаддаг болсон. ОХУ-ын шуудан БНХАУ-ын шуудантай хамтраад гурван улсын гэрээг эхлүүлж транзит тээврийг нэвтрүүлсэн.
Бас маш их хөрөнгөтэй, Улаанбаатар хотод олон салбартай гэсэн байна. Энэ худлаа. Өмнө нь байсан удирдлагууд салбаруудыг нь өөрсдөдөө аваад үрэн таран хийсэн байгаа юм. Улаанбаатарт шуудангийн өөрийн гурван салбар байгаа. Хувьчлалын мөнгөөр хоёрыг нэмж авсан. Бусад нь манайх биш. Та бидний үр хүүхдийн өмч хөрөнгийг улстөрчид өөрийн хүнээ томилж иддэг уудаг зүйлийг зогсоох ёстой. Дүүгээ, эхнэрээ, туслахаа ажилд шахдаг зүйл байсан. Одоо ч байгаа. Энийг болиулах ёстой. Үүнийг хамгаалж гарч ирж байгаа гишүүнийг үйлдлийг би буруушааж байна. Харин хувийн хэвшил орсноороо энэ байдлыг зогсоож байгаа.
Т.Аюурсайхан гурван жилийн өмнөөс “Монгол Шуудан”-тай холбоотой асуудлаар хариу үйлдэл үзүүлж эхэлсэн. Тэр бол түр зуурын үзэгдэл. Сонговол сонгогдоно. Сонгогдохгүй бол гудамжинд цүнхээ бариад л алхана. Одоо Төрийн банк, МИАТ-ийг хувьчлахгүй гэж амь нь тэмцэж байна. Би үүнийг хувьчлах ёстой гэж үздэг.
Улстөрчид хувийн хэвшил, татвар төлөгчид рүүгээ шууд дайрдаг. Тэгсэн хэр нь ямар ч хариуцлага хүлээдэггүй. Улстөрчид бизнес рүү хутгалддаг зүйлд өнөөдрөөс цэг тавъя гэдэг саналыг дэвшүүлж байна” гэлээ.
Г.Сүрэн
| Уншиж байна |