2022 оны ДАШТ, 2023 оны Азийн АШТ-ий урьдчилсан шатны “F” хэсэгт өрсөлдөж буй Монголын хөлбөмбөгийн шигшээ баг өнөөдөр хэсгийнхээ хамгийн хүчтэй баг, дэлхийн чансааны 31-д бичигдэж байгаа Японы багтай хүч үзлээ.

Европын топ таван лигт тоглодог шилдэг тоглогчдоос бүрдсэн Японы шигшээ багтай нүүр тулсан манай залуус минут, секунд бүрийг үр дүнтэй, анхааралтай, хичээл зүтгэлтэйгээр өнгөрүүлж, эх орныхоо төлөө чадах бүхнээ хийв. Тоглолтын эхний үед Японы шигшээ баг дөрвөн гоол оруулсан бол сүүлчийн хагаст манай залуус шигүү хамгаалалтаа үргэлжлүүлж, хянуур тоглосны хүчинд нэмж хоёр гоол алдан үндсэн цагт 6:0-ээр хожигдлоо.

Монголын хөлбөмбөгийн шигшээ баг аравдугаар сарын 15-нд эх орондоо дэлхийн чансааны 97-р байрт бичигдэж байгаа Кыргызстантай тулж, үзэгч хөгжөөн дэмжигчдийнхээ өмнө тэднээс оноо авахын төлөө байгаа бүхнээ дайчлан тоглоно.

Япон-Монгол 6:0 Гоол: Минамино 20 мин, Ёшида 24 мин, Нагатамо 30 мин, Нагай 38 мин, Эндо 55 мин, Камада 82 мин

М.Бүүвэй