Монголбанкнаас 2020 оны Мөнгөний бодлогын үндсэн чиглэлийг өргөн барьсан. Үүнтэй холбогдуулан Монголбанкнаас мэдээлэл хийлээ. Энэ жилийн тухайд эдийн засгийн өсөлтийг 7 хувьтай байхаар тооцжээ. Эдийн засаг руу гарч байгаа зээлийн хэмжээ энэ жил 14 хувийн, ирэх жил 12-13 хувьтай байхаар төсөөлсөн байна.

Мах, бензин, түлшний үнэтэй холбоотойгоор инфляци сүүлийн хоёр жил савлагаатай байгаа. Ирэх жил ч энэ хэвээр үргэлжилнэ гэж үзжээ. Монголбанкны Газрын захирал Б.Баярдаваа:

-Ирэх жил манай улсын хувьд цэвэр зэсийн үнийг ирэх жил 6000 ам.доллар, алт 1410 ам.доллар, нефьт 64 ам.доллар байхаар төсөөллөө. Монгол Улсын гадаад өрийн хэмжээ нэрлэсэн дүнгээр 29.5 тэрбум ам.доллар байна. Энэ нь ДНБ-ий 224 хувьд тэнцэнэ. 2024 онд 19 тэрбум ам.долларыг төлнө. Гадаад өрийн төлөв байдал эдийн засагт дарамттай. Гадаадын өрийн төлбөрийг хийхдээ эдийн засгийн нөхцөлд хүндрэл учруулахгүй, дахин санхүүжилттэйгээр хийнэ гэж үзэж байгаа. 2020 оны мөнгөний бодлогыг хэрэгжүүлэхдээ олон улсын холбогдох байгууллагуудтай хамтын ажиллагааг тогтооно.  Төвбанкны гадаад өрийн хэмжээг бууруулна. Зээл олголтын зарчмыг олон улсын жишигт нийцүүлэх юм.

Мөнгөний бодлогын хүрээнд инфляцийг 2020 онд хүртэл 8 хувьд барьж, дунд хугацаанд 6 хувьд хүргэнэ. Хөрөнгө оруулалтын үр өгөөж ирэх жил эдийн засагт эерэг нөлөө үзүүлнэ хэмээн мэдээлээд сэтгүүлчдийн асуултад хариулав.

-Мега төслүүд хэрэгжсэнээр эдийн засагт эерэг нөлөөлөх үү?

-Тавантолгойд төмөр замын төсөл хэрэгжүүлэхтэй холбоотой “Эрдэнэс Монгол” ажиллаж байгаа. Хэрвээ гадаад санхүүжилтээр төсөл хэрэгжвэл үр өгөөжтэй байна. Гэхдээ 2020 оны суурь төсөөлөлдөө бид үүнийг оруулаагүй. Хэрэгжүүлэх санхүүжилтийн эх үүсвэр одоогоор шийдэгдээгүй. Хэрвээ дотоод нөөц бололцоогоо ашиглавал эдийн засагт хүндрэлтэй.

-Гадаад валютын нөөц ямар байна вэ?

-Гадаад валютын нөөц 3.7 тэрбум ам.доллартай байна. Энэ нөөц зөвхөн Монголбанкны бодлого үйл ажиллагаанаас хамаарахгүй. Монгол Улс дэлхийн эдийн засагтай ямар байдлаар харилцаанд орж байгаагаас шалтгаална. Монгол Улс ямар хэмжээний гадаадын хөрөнгө оруулалт татаж байна, зээл авч байна гэдгээс шалтгаалдаг. Монголбанк дотоодын зах зээлээс алт худалдаж авах байдлаар нөөцөө нэмэгдүүлж байгаа.

Н.Энх