3х3 сагсаар Азидаа хамгийн шилдэг нь МОНГОЛ

Саяхан БНСУ-д болсон 3х3 сагсан бөмбөгийн Дэлхийн гранпри - Inje Challenger тэмцээнд Монголын баг тамирчид  маш амжилттай оролцож, 3-р байранд орсон. Энэ үеэр Монголын баг тамирчдын амжилтыг гайхсан, шагшсан мэдээллүүд Азийн, тэр дундаа Солонгосын спортын хэвлэлүүдээр нилээд гарчээ.

Тухайлбал Солонгосын Daum.net, Jumpball спортын агентлагууд энэ талаар тусгай сурвалжлагууд бэлдсэн байна. 3х3 сагсан бөмбөгт дэлхийн чансаагаар 5-д эрэмбэлэгддэг Словенийн Пиран багийн алдарт тамирчин Ч. Овникоос Солонгосын сэтгүүлч дараахь асуултыг асуужээ.

- Азийн багуудаас хамгийн шилдэг нь аль баг вэ? Манай Солонгосын баг амжилтаа ахиулахад юу чухал вэ?

- Азидаа хамгийн шилдэг нь мэдээж Монголын Ulaanbaatar MMC Energy баг. Миний хувьд өмнө нь 5х5 төрлөөр Монгол гэж мэддэггүй байсан. Гэтэл 3х3 төрлөөр энэ баг Монголыг шууд таниулсан. Солонгосын мэргэжлийн багууд сайжиръя гэвэл Монголын багийг л харж, суралцах хэрэгтэй.

Монголын 3х3 сагсан бөмбөгийн баг тамирчид үнэхээр ч дэлхийд “цахиур” хагалж байгаа бөгөөд саяхан FIBA буюу Сагсан бөмбөгийн олон улсын холбооноос 3х3 сагсан бөмбөгийг хамгийн амжилттай хөгжүүлж байгаа орноор Монголыг нэрлэсэн юм.

Мөн Монголын 3х3 сагсан бөмбөгийн баг дэлхийд чансаагаар эхний 5-д эрэмбэлэгдэж байгаа. Одоо олон улсад энэ эрчээр оноогоо цуглуулж чадвал Монгол Улс 3х3 сагсан бөмбөгийн төрлөөр ТОКИО 2020 олимпод оролцох боломжтой юм.

Эх сурвалж: Ikon.mn