Жүдо бөхийн 2019 оны дэлхийн аварга шалгаруулах тэмцээн Японы нийслэл Токио хотноо маргааш эхэлж, есдүгээр сарын 1 хүртэл үргэлжилнэ. Олон улсын жүдо бөхийн холбооны вэбсайтын мэдээллээс үзэхэд 149 орны 860 шахам жүдоч тус ДАШТ-д оролцохоор мэдүүлгээ ирүүлжээ.

Ийнхүү оролцогчдын тоогоор урьд өмнөх ДАШТ-үүдийн дээд амжилтыг эвдэж байгаа аж. Дэлхийн аваргаар тодорсон тамирчин 26 мянган ам.доллар, хоёрдугаар байрт 15 мянга, гуравдугаар байрт 8 мянган ам.долларын шагнал хүртэх юм. Энэ тэмцээний хувьд эрэгтэйчүүдийн 33, эмэгтэйчүүдийн 23, багийн 15 дахь удаагийн ДАШТ юм.

Өнгөрсөн жилийн жүдогийн ДАШТ 2018 оны есдүгээр сард Азербайжаны нийслэл Бакуд болсон бөгөөд Монгол Улсаас Д.Сумъяа, Л.Отгонбаатар, Ө.Дүүрэнбаяр нар тус ДАШТ-ээс хүрэл медаль хүртэж байв. “Токио-2019” ДАШТ-д зодоглох Монголын шигшээ багийн бүрэлдэхүүнийг танилцуулья:

Эмэгтэйчүүдийн 48 кг-д М.Уранцэцэг, Г.Наранцэцэг, 52 кг-д Б.Хорлоодой, Л.Сосорбарам, 57 кг-д Л.Энх-Отгон, 63 кг-д Б.Мөнгөнчимэг, Б.Ганхайч, 70 кг-д Ц.Энхчимэг, -78 кг-д О.Мөнхцэцэг.

Эрэгтэйчүүдийн 60 кг-д Д.Амартүвшин, 66 кг-д Ё.Басхүү, 73 кг-д Г.Одбаяр, Ц.Цогтбаатар 81 кг-д О.Ууганбаатар, 90 кг-д Г.Алтанбагана, 100 кг-д Л.Отгонбаатар, +100 кг-ын жинд Н.Түвшинбаяр, Ө.Дүүрэнбаяр нар хүчээ сорих юм.

Ц.Ганбат