Монголын Үндэсний бөхийн холбооны тэргүүний асуудал одоог хүртэл эцэслэн шийдэгдээгүй байна. Өчнөөн жил өнжин хэрэлдэж, бие биедээ бичиг цаас чулуудалцсан уг холбооныхон эцэстээ залуу аваргаар “туг тахичихав уу даа” гэсэн харамсал тээх боллоо.

Өнгөрөгч 2017 оны тавдугаар сард МҮБХ-ны ээлжит бус “Их эе” хуралдаж бөхийн холбооны тэргүүнээр “Гацуурт”  компанийн ерөнхий захирал Л.Чинбатыг сонгосон. Дараа нь МҮБХ-ны наймдугаар “Их эе” 2018 оны гуравдугаар сард хуралдаж МҮБХ-ны тэргүүнээр УИХ-ын гишүүн Б.Бат-Эрдэнийг сонгосон. Ингэснээр үндсэндээ МҮБХ Л.Чинбат, Б.Бат-Эрдэнэ гэх хоёр тэргүүнтэй болоод байгаа юм. 

Ингэж л бөхчүүд хоёр “толгой”-той болсон хэрэг.  Дараа нь чи, би дээ тулж, бөхийн өргөөний хаалга өөд чулуу нүүлгэлцэж маргаан нэлээд ширүүссэн. Хүчийг үзэж хэн бяртай нь өргөөгөө авах гэж ийнхүү улайран тэмцэж байснаа гэнэтхэн зогсоож “Эвлэрлээ” хэмээн гар барьцгааж байв. Гэтэл үнэндээ өнгөн дээрээ тэд эвлэрсэн ч өрөөнөөс гараад элдэв “хороо” найруулсаар л суудаг гэх.

Өнөө жилийн улсын их баяр наадмаар Б.Бат-Эрдэнэ тэргүүний бөх буюу түүний шавь Э.Оюунболд ес даван түрүүлж улсын аварга цол хүртэв. Гэтэл түүнийг сэргээш хэрэглэсэн гэж хэн ч мэдээгүй, ард түмэн “Допинг илэрсэн хоёр бөхийн нэг нь Оюунболд л биш байгаасай” хэмээн бараг л залбирч суутал Л.Чинбат тэргүүнтэй холбооны зүгээс “Оюунболдоос илэрсэн” гээд яаран зарлачихсан. Албан бус энэ мэдээлэл түгснээс хойш удтал хүлээлгэсний эцэст Улсын аварга Э.Оюунболд өөрийн цахим хуудсаараа мэдэгдэл гаргав.

Тэрбээр “Монгол бөхийн хоёр холбооны маргаан эцэстээ хүрч, түрүү бөхөөрөө бусармаг үйл явдал хийж байна. Би 14 наснаасаа хойш аварга багшийнхаа шавь болоод явж байгаа. Аварга багш маань надад “Архи ууж болохгүй, допинг хэрэглэж болохгүй” гэж хоёр зүйлийг маш сайн захиж байсан. Би допинг хэрэглээгүй. Миний шээс солигдсон байна. Энэ бүгдийг хууль хяналтын байгууллага шалгаж өгч тусална уу. Энэ бол зохион байгуулалттай гэмт хэрэг, миний шилийг сольсон байна. Би ДНК шинжилгээг өгмөөр байна. Намайг хилс хэрэгт гүтгэж байна. Нэгэн цагт барилдаж байсан Хадбаатар аваргыг дийлэхгүй болохоороо хилс хэрэгт гүтгэж байсан. Оюунболд гэдэг хүнийг бас гүтгэж байна. Миний өв соёлоо хамгаалахын төлөө тэмцэнэ гэдгээ илэрхийлж байна” хэмээн мэдэгдэв.

Улсын аварга Э.Оюунболд удтал тайлбар хийхгүй явсны эцэст нь дээрх мэдэгдлийг хийлээ. Гэсэн ч олон нийтийн эргэлзээ хэвээр үлдэв. Улсын аварга Э.Оюунболд гуравдагч орон руу хандаж, ДНК шинжилгээ өгнө гэсэн. Үүний дараа л бүх зүйл тодорхой болж эргэлзээ арилах бололтой.

Б.Итгэл