Үндэсний баяр наадмын шөвгийн 16 бөхөөс шинжилгээ авснаас хоёр бөхөөс нь допинг илэрсэн талаар Үндэсний баяр наадмын зохион байгуулах комисс мэдэгдсэн.  Допингийн шинжилгээ өгсөн бөхчүүд энэ асуудлаар өөрсдийн тайлбарыг хийсэн бөгөөд  Улсын аварга Э.Оюунболдыг тайлбар хийгээгүй явсан билээ. Харин тэрбээр  цахим хуудсаараа дамжуулан мэдэгдэл хийлээ. Улсын аварга Э.Оюунболд:

-Монголын хоёр бөхийн холбооны маргаан  эцэстээ хүрч, түрүү бөхөөрөө бусармаг үйл явдалд хийж байна. 14 наснаасаа хойш аварга багшийнхаа шавь болоод явж байгаа. Аварга багш маань надад “Архи ууж болохгүй, допинг хэрэглэж болохгүй” гэж хоёр зүйлийг маш сайн зохиж байсан. Би допинг хэрэглээгүй. Миний шээс  солигдсон байна. Энэ бүгдийг хууль хяналтын байгууллага шалгаж өгч тусална уу. Энэ бол зохион байгуулалттай гэмт хэрэг, миний шилийг сольсон байна. Би ДНК шинжилгээг өгмөөр байна. Намайг хилс хэрэгт гүтгэж байна. Нэгэн цагт барилдаж байсан Хадбаатар аваргыг дийлэхгүй болохоороо хилс хэрэгт гүтгэж байсан. Оюунболд гэдэг хүнийг бас гүтгэж байна. Миний өв соёлоо хамгаалахын төлөө тэмцэнэ гэдгээ илэрхийлж байна” хэмээн мэдэгдэв.

Улсын аварга Э.Оюунболд удтал тайлбар хийхгүй явсны эцэст дээр мэдэгдлийг хийлээ. Дээрх мэдэгдэл мөн л олон нийтийн дунд  эргэлзээ хэвээр үлдэв. Монголын Допингийн холбоо, Баяр наадмыг зохион байгуулах үндэсний хорооныхон хоёр бөхөөс допинг илэрсэн гэх албан ёсны мэдэгдэл, Э.Оюунболд аваргын мэдэгдэл гээд допингийн асуудар маргаан дагуулж, хууль хяналтын байгууллагаар дамжих нь. 

Н.Энх